朗聲四起

pquyu cimu cikay gaga na psaniq qa yaw na pnbahu ro yaw na qmalup.

1. gaga psaniq skura yaw na pnbahu

(1)iyik ryax na Sm’atu ro Kmluh ga, ana mlikuy ro knerin ga ini hmtiy tmring kgi, ini tmring pala ro wayay uyi.

(2)iyik ryax na Sm’atu ro Kmluh ga, shtuyiy snqwaq kmayan, laxun mcayu, mtiyaw qmayah ga ini syahax qcyan naha ro ini t’asuy nguhux uyi.

(3)kluh trakis neta iyik mlahang gaga na Kmluh ga, htuy musa qmalup qcahuy rgyax.

(4)ryax na kluh trakis ga, ini pyutiy puniq na hka’ muyax.

(5)shtuy s’agan quci na cquliq tmwang qbuli bih qmayah kya.

(6)shtuy naha trang Kmluh ro Sm’atu ga, musa thiriq pnbahu ro qmayah na cquliq.

(7)ryax na Kmluh trakis ga naring hugan, si prkyas mwah kmut trakis. siga Kmluh ga, cyan cquliq nyan mhkngi bih babaw qmayah knlahang ta trakis ga, cqani ga psaniq ro nyan hmiriq gaga son ta. nanu mica siga hngi mtiyaw, mna ta cugan ryax ro kluh loyi.

2. gaga psaniq skura yaw na qmalup

(2)maki cquliq qmqlup rgyax, knerin maki muyax ga ini tmring nuka.

(3)qalang kya ga t’lu gaga na msqunan, ini ga yaw na hnqilan, yaw na pnqas, smqas yaw, ini ga pt’lu yaw mqquriq, ini nbah musa qmalup rgyax, ini gluw gaga ga maki cquliq magal qilis.

(4)cka ryaniq nwah qmalup Tayal, siga maki cquliq kxalan, magal qilis…, musa hngow qabax yaw na qmalup, ro psbzinah mwah muyax.

(5)iyik musa qmalup ini blaq spi nya, ini ga qutih pqwasan na siliq, musa qmalup loyi ga, musa ungat nagal naha, ini ga kngun musa magal qilis ccquliq.

(6)iyik musa qmalup ga mung pgleng na mrhuw qutux snlitan, ini hmtiy tbuci qmalup nanak.

(7)cka na nyan qmalup ga ini tbah cpung mkayan maha, pisa galan ta qsinux.

本文介紹泰雅的農作與狩獵的禁忌：有農作禁忌、狩獵禁忌。