朗聲四起

nyan ki’an roq na Taywan qaniy qa llaqi tayal ga, garing cqa cka rgyax na Sgaga ki rgyax na quri Hagay, qabax llaqi na tayal ga nyan mqasux maki cqa llyung Mnibu ki llyung Klesan, garing bawiq na rgyax ro tehuk cqa syax na bcilung, qabax roq qaniy ga, giwan pinhkngyan na bnheci ta cyunga.

llyung na Mnibu ga giway rrgyax, mkura te byaqan wagi ga qenah bawiq qa rgyax nya, pisang nqa rgyax Zirhiy ki rgyax Bayu, tyugan seng meta kinbawiq nya. puqing kinhulan llyung Mnibu qaniy ga, minkahul cqa gong Sgalup, gong Ggiyu, gong Memutang, gong Bubul qalang na Pyanan,cka na llyung Mnibu ga maki gong na Roba, gong Banun, gong Sesuy ru gong Soko.

roq na llyung Mnibu qaniy ga, giway mttasiq rgyax nya, blaq qa cinbwanan nya, mtasaw qa qsya nya, uka ciyan sinnqwaq nya, s’unan qwas na qbhniq pungan, uka pincpngan kinbleqan salan mcisan ru mangay qabax ccquliq. pisang nqa ryaniq na qpa, pitung bcilung qalang na Talah, gong na Tamarong, ryaniq qalang na Syanuh, ocya qalang na Tamarong, ulay qsya qalang na Pnbong, ali hbkiyan qalang Banun, qqhuniq na Tayhezang, pitung rgyax na Hmuqan, qmayah tbihi na Qnoran, san mcisan bcilung na Khuyan, gong na Skikun, qmayah tbihi roq na Mnoyan, gong na Bubul ru rgyax qali qalang Pyanan, babaw quri Sqabu ru llyung na Kulu...

roq cyan ki’an ccquliq na llyung Klesan hiya ga, giway ssnat kus rrgyax ki bcilung, ini ptnaq qutux qutux qalang, minnank calay cinbwanan nya, khmay cbalay ccquliq mwah mcisan ro mangay qalang nha, garing ryaniq na syax bcilung, kltu qsya na Iyu, muya yabong ro tqinux, roq m’ma pqmahun na Nango, ulay qsya na Pyahaw, mtayil gong qsya bawiq puqing Klesan, tgliq qsya na Lopuy, ryaniq bnheci tayal cyunga cyan maki cqa Buta, klahang qqulih na gong, san mcisan ro m’abi roq na Kinyang, tgliq qsya na Rgayung ro cyan muya qsipi, sgiway rrgyax ki llyung ro ga qa knkyan ta qabax.

泰雅族主要居住在中央山脈與雪山山脈之間，其中宜蘭縣族人分佈於大同鄉與南澳鄉。大同鄉境內多山，地勢西南高，喀拉業山、南湖北山聳立。蘭陽溪是主要溪流，擁有馬當溪、梵梵溪、清水溪等多條重要支流。南澳鄉則三面環山、一面靠海，位於蘭陽平原南側，有南湖北山、三星山（縣最高峰）等。主要溪流包含南澳北溪、南澳南溪及和平溪。兩鄉均具山高水多的地理特色。我們居住在高山叢林與綿延不絕的河谷溪流中，繼續生存著。