朗聲四起

Ihapav ti ata miqumis, vaivivaivi mita ka bunun siduq palunqaqtungan. Haiza Takisilazan, haiza Tauluu, haiza Puut, haiza Ngai-ngai siin Baqlu mininsuma tu siduq. Duduan haiza amin a danqas qulbu’ siin Taqdunglaas. Ihaan tastu qainian a, na palungqaqtung ata madaingaz tu bunun, talmamainduu siin uvavaz’az. Maaq a malkabunun tu sinkuzakuza a maszang tutuza malka sia ank’anak tu sinkuzakuza. Maaq ata bunun a asnii piqdiun duma bunun, asnii amin katamalun i duma bunun. Imita mailantangus tu madadaingaz maisnava mita tu; maaq a madadaingaz asa dau tu madaidaz i uvavaz’az. Maaq a maindudu’aza asa tu maqasmav kuzakuza saipuk i tastulumaq. Maaq dau ka uvavaz’az a asa tu tan’a ki madadaingaz tu sinhihiqin qalinga, matumasqing madadaingaz tu sinkadaidaz.

Ihaan ka’ku mapasnava tu pantu, asa tu malmananu vingkiu, katu mangai, katu pakahahau. Sia madudungdung tu u’uskunana sunkavaizan. Ihaan lumaq a, asa dau tu kapimaupa ki tamatina tu sinbabazbaz, kapimaupa ki masisituqas tu sinkakalun, madaidaz i masisinauba. Maupa ti dau ka itu maimadadaingaz sinava mita qansiap siin taiklas.

Maisnaqabasang a, haiza mita Bunun malkabunun tu samu; nii dau ka uvavaz’az masihal i tamakasu ki madadaingaz, nitu maqtu ansais i madadaingaz masihal tu qalinga, nitu maqtu mavail mapuntini ki imita madadaingaz. Masamu dau ihaan bunun tu tanangaus kis’ang, masamu mapusaksak babazbaz, nitu qalmang tanqai’iu itu bunun tu qaimamangsut. Masamu maqaitbas i minintinalu tu bunun. Masamu matamal i mapipiqa siin matitiqav tu bunun, masamu maqainan i matataimang tu bunun siin aitazanin bananaz tu binanau’az.

Maaq i maun titi a sia tamatina maqusil, nitu qalmang siza maun, masamu maqam siza ki qaimamangsut, asa tu mapasitda isaiv duma bunun. Haiza taintungu tu bunun a, sia taintungu tu bunun a ngausun pi’abuq mapakaun. Masamu mapisauqzang i taintungu tu bunun. Aupa maaq a mapisauqzan taintungu tu bunun a, na’usaisan i qanitu ik’amin maun a tastulumaq ta tu kakaunun. Paqpun asa dau ata tu masaulvaz malkabunun.

我們不願被人欺壓，也不願被人瞧不起，對待別人就要像對待自己一樣。前輩教我們，老者要憐愛小孩、壯年者要努力工作、小孩要聽老者的勸戒。在學校要很認真，不要懶惰、打架。在家裡，聽從父母之言，是我們的待人之道。

布農族有待人禁忌，小孩不可輕視長上，不可遺棄長輩。吃肉要按照父母所分配的享用。不讓客人餓肚子。我們應該慷慨待人。