朗聲四起

madalamaku ki bangabangale, asi luiyaa ngwalai ki bulaneini taka puliyaneini, luceela matiya kikathalrai tuhamuhu ki umase.

ikay ki masaleese ka ububula, waceelaku ku bangabangale, eaea ka cebe matisepele, la ahakayaku ikay alrimali suwasulrape, wasabalriyaku ku twalai iniya ku sangulralreeme, la kucucaku deethe iniya akutitiki sidruhu ikay seketeli pikidremedreme ka vaga, apya pilutaku si iluku putauwana, pauwa ki makasudange si syavavava kauhyahyahiva iniya lu kasepelaku, ai lukidremedremaku, kay babekaca ka lregelrege masudaedalepe iniya.

pasingikaiyaku ki lalyalili ka kacalrisiya kilalra si thingale, kay bangabangale kahananelringa ki Ngudradrekai. kay Ngudradrekai ku taikaiyanelini, yakai Takau ka Maulring Guu si yakai Akau ka swa Vudavudai, la ikaiyana ku yakai Taitu ka suTahumake. kay Ngudradrekai masasyatalragi masasutalu ikay babekaca ka daedae, amani ku lalaalake ki Twaumase ki lrgelrege.

ikay ki tamacapicapila ki Ngudradrekai, ku langu umawmase kadruwa ka aimaka dulru cwacapange sibengelrai ku bangabangale, lu ikay ku tamulrivila pasikai ki cekele, lu singikai ku kakuwakudha ki cekele tulrevege, ani palrainga ki mahudrange si talyalalai ki cekele, aimaka dulru ki patahumaha ku pakalrevaini ku nipulalaka ka bangabangale. amani ku sapatuthingala ku hakaca gahanga ki sauwalai, amani ku sapatuthingala ku tangikakilibaka kabula ki ababai. kay lrigu ki bangabangale, ikay ki kidremedreme ki Ngudradrekai, masilriyalribate ki thahihaneini.

ku matisamaliya ku thahiha ikay babekaca, ikay ki makaelaela ka bengelrai athingala, ku tatukulava adrava ka lataha zegazega kadruwa ka aidulru cibuku ku sazegezega pakihamau. sana ikay ku daedae kay nibekacanenga ka labengelrai demedeme, wabaai mita ku sakiahagai! kay bangabangale miyalri ka nipaukalrivila tinubula ka wacebecebe, amani ku sakiyalibake ki Twaumase.

lu elrelreanenga singipathagili kay tamatikaiya ki bangabangale, ku thahiha ki tangimiyaiyaneini, ku paluludaneini ikay ki tamacapicapila ki Ngudradrekai, ku tapalrilrikuwa ikay ki sisiyu ku tamulrivila ki lawacebecebe ka bengelrai, kyapautengaku, aitaha amiyaiyanumi nakuwa kadalame pasingikidremedreme ki bangabangale!

與百合花的邂逅。百合花是魯凱族族花，百合被賦予純潔、勇敢等象徵意義，族人對於百合花的敬愛已經提昇至精神意義，甚至代表了社會秩序與倫理。

百合花多彩繽紛的花色，馨冽香氣讓人難忘，堪稱是春夏之際庭園最美的身影，即使是畫家，恐怕也無法調出如此的色彩。