朗聲四起

inaayaw, mulecuh ku belaw tu lutungay a tatayna, ayza a labi hamin sahenay namalabi, miladay kaku tu ina aku tayza tu heniyan a mizizaw. mataenang kya lutungay i kakabi’an nu wawa, sicaedung tu salengacay atu sumanahay ku kulit a zikuc, situpel tu kalawlaway a kulit, tabaki ku mata, mangazu kya bihid, sakaymawan sa! manamuh kaku atu cina aku cinizaan.

“ ayay! sakaymawan sa kina wawa! ” sammeteken aku amiazih ciniza, cucu masangiw tuwaca tina lutungay a tataynaan, cay tuwaca pakahemhem a padiyu’ tinawa. suda hanaku ku lima amilablab tu bihid nina lutungay, ahemi’, apek, malecad tu mahka nisudatan namakapalud a mian-paw. lablaban aca aku kya cayay henay kasibukes a tukun nu tangah, kaynah hantu kaku nuyna sakamu satu, mana pilablab tu tangah nu lutungay. tabuen nya wina nya lutungay tu tibukulu ku lima niza, haymaw hanaku amimi’mi’ kya adidi’ay a lima niza, ya lima niza saungaungay satu, mahiza amibalakasay i takuwan. waw! mulusu’ tahekal ku ngangay niza, sakamuhan tu waku kuyna nya lutungay, “ ina! mulusu’ ku ngangay i tatangahan niza! ” mananam tu kuyna nya lutungay au adidingay a sasubin ku sasipu tu i tangahay a tanang atu mulusu’ay a ngangay. manamuh kya lutungay saungay sa ku kuku’ atu lima, azihan mahiza utunu namuh sananay.

sakamu sa ku ina nya lutungay, ci Lisin ku ngangan niza sa, uynisa u ngangan nu bayi niza. sakamu han tu aku ci Kulas ku ngangan aku hanaku, u ngangan nu baki aku. manamuh kaku tina wawaan, adasay kalamkam abalaki kizawa, kapah tu sacabayan aku midang. atayni aca kaku miziziw cinizaan anucila.

鄰居家裡生了一個小女嬰，我跟著媽媽一起去看小女嬰。她躺在嬰兒床上，眼睛大大的，臉蛋嫩嫩的，好可愛！我忍不住伸出手摸她的臉頰，好像是剛出爐的麵包，本想再摸的頭，卻被媽媽斥責，不可以摸小嬰兒的頭。

女嬰的的手被包起來，她的小手動呀動著，好像是要跟我玩。女嬰叫做Lisin，也是她外婆的名字。我說我的名字叫Kulas，是我爺爺的名字。希望她快快長大，就可以跟我一起玩兒。