朗聲四起

kay subelebelenge amani kudra akabalribalrithi ka hungu. lu kalisi wa tamenge ki lringau, lapadalru alralrese si akuadrau tubi, ku lreseini syaete ki swiru, kunaku si lagili la paku tikinai pudrapale si sikasa kibubuli mulatadre, wa pilutunai ku makalra ku biya ki angatu si tuvahuhukuhu, akuea pauwa ki acilai, paipeapelai patupapalra ki acilai.

kay angatu myaki waidii ka hungu, sadedethenga subelebelenge. idra ngwadadethe ki tala aubu ka daane, makalra ku langatu, yakai ku cebe ki gingging, kuhisi, mumu, tyanese­­ sana utakelanenga ku takalrelrema ki madru, taha ahakaiyaku ku mahyahidahenga ku sulivata ubelenge, palalava idra kameameaneana si atatadradrau ka madru. madalamaku twakaenene ikay lrilriya ki angatu, dredre idra mathathahade ikaydaedae ka thulida, lu kaladrangedranga ku takulasease wagagetai tusenai pathahukai ki kaladrangedranga, kialalralalraku si kaipulringalringau sika mwa adringinganaku ki mathahihi ka sipi.

kudra lrilrikudru ki daane yakai ku swa adrau ka balebalebale, miyalri ka taingeaa ka matiyasamali ka hungu, myaki yasipia ki lavavalake ka abubulru. kwani tina ka tahukuku silryalribate nakuwa ku dalama ki balebalebale, ahakai ku biya ki balebale si ikai kalilyupa ki angatungatu, la dahepe ku asakusadha ka lisisuku, si ikai ki lisisuku tubatuku.

kudra hyuku amani kudra matiyadalame ka hungu, yakai ku ma mamelre kasulrapele ka lrumu, kuladha ka drapale, himumudrui ka kinaumasa, tikiya ka ngudui, sana kathahihi ku vai, lu amiyalrealre kudra tina wailuku ki lalaalake, mwaki angatungatu muhi akanea kivaevae. kwani tina lu kidulrunga la takaenene si cececeele ki lalakeini, si kisupisupilri ki lalaalakeini lu ikai iniya ngithalringulu, kihahaahagai makekevele.

ku taka lavavalakanemadu, patenga ka myaki amani kudra kadruwa ka amakalrepenga silrigu ka hungu, kiasietemadu ku thalradha ki wacekecekelemadu, yakai ku swa adraadraadrau ka subelebelenge, yakai ku kadruwa ka akahimuhimuha ka balebalebale, yakai ku matiyadalame ka hyuku, ai apalralrauthaku kisilrigilrigu kingulrialringau nakuwa.

天空是本變化多端的書。有時放晴，有時下雨。果樹像站著的書，離天空最接近，喜歡爬上品嚐新鮮、碩大的果實。樹底下的落葉像絢麗的羽毛。夏天，聽蟬兒奏著「夏日組曲」。家後面的大片竹林，是一本神奇的書，像夢幻童話世界。小雞是本可愛的書，軟毛、小腳、圓身，小嘴，喜歡覓食、玩耍。在雞媽媽身旁繞來繞去，追逐遊戲。

童年是一本讀不完的書，有無盡的愛，遼闊蔚藍的天空，神秘難忘的竹林，靈巧可愛的小雞兒，令人難忘。