朗聲四起

nanu’ squ nxal ga, trang mhngaw sami ryax qasa, cyux tminun yaya’ mu, ru musa’ saku’ bih nya’. kyalun mu muci “ aya’, kahul su’ inu’ isu’? ”

kmal Yaya’ muci “ kahul saku’ Gogan ” ma. kyalun mu lozi muci “ kahul inu’ yaba’ hiya’ pi?” kmal yaya’ muci “ kahul Nahuy hiya’.” lungun mu ru swa’ nanak muci saku’ mnglung. ru kyalun mu muci “ swa’ simu mqbaq ki Yaba’? swa’ mu ini’ baqi kun? ” ru msyaq Yaya’ mu muci “baha su baqun lpi? ungat su’ kya na’, nanu’ nyux su’ lungun? ” kyalun mu lozi muci “ iyat ga, nyux saku’ mnglung muci swa’ nanak Cang tunux lalu’ mu kun? ru Cang uzi tunux lalu’ na Yaba’, ga swa’ iyat Cang isu’ hiya’ muci saku’? ”

ru kmal yaya’ muci “ tunux lalu’ hiya’ ga tnaq lalu’ na bnkis ta’. ini’ tnaq tunux lalu’ ga ini’ tnaq bnkis nha’. m_yan qani ga thuyay msqun ru! qutux bnkis hiya’ ga ini’ thuyay msqun gaga’ tayal hiya’. ” ana mu ini’ pyang baqun na’ ga, si saku’ uci “ han! ” smyuk.

bsyaq hazi lga, mita’ sami syasing na minkekong yaya’ mu ki yaba’ mu. ru kyalun mu lozi yaya’ mu muci “ aya’, talagay kinbetunux su’ balay！cyux saku’ inu’ kun hiya’ pi? ”, msyaq lozi yaya’ mu muci “ baha su’ maki’ kya lpi? ungat su’ kya na’! ” ru kyalun mu yaya’ mu muci “ aya’, babaw nya’ ana maki’ ’laqi’ mu ga, iyat saku’ pshriq isu’. ”, si ktay si uci “ pyax ” kbway roziq na yaya’ mu mita’ kun. “ ha! nanu’ muci su’? baha maki’ ’laqi’ su’ ini’ su’ kekong lpi?”, “ nanu’ ita’ kekong ma’? aki’ saku’ ini’ shriq isu’ la! ” son mu kmal lru, memaw balay si “kha! ha! ha! ha!” msyaq yaya’ mu. ru kmal yaya’ muci “ zyuwaw na babaw hya’ ga ini’ baqi smpung, tehuk kawas su’ lga mutu ini’ ptnaq nanak la. ”

balay pi!

某天，媽媽正在織布，我問媽媽、爸爸是從哪裡來？媽媽是從嵙崁來的，但爸爸是尖石人，我想了想覺得很奇怪，「為什麼我姓張，爸爸姓張，但妳不姓張？」媽媽說：「不一樣的姓就是不同的祖先，同一個祖先是不可以結婚的。」過一陣子，我看著爸媽的結婚照，跟媽媽說：「將來我有孩子，我也不要離開妳！」媽媽說：「將來的事不能預測！年齡一到，都會不一樣。」哈哈笑了起來。