朗聲四起

mama’ Yukih hya’ ga rima’ mrayrhuw kawas nya’ squ mwah sqani Tinskyuw la, ryax na hintgan nya’ hya’ ga, minkuk 2 kawas hiya’, nanu’ squ psinriy qasa ga ki’a hazi sa minkuk 49 hazi la, lpgun lga wal hazi’ sa 47 kawas nya’ la.

nanu’ squ musa’ mwah sqani na’ qu Tinskyuw ga, sgalu’ nha’ balay qu qnxan na ’Tayal maki’ rgyax gi yaqih balay qnxan na ’Tayal sraral ha, nanu’ yasa qu halan nha’ smatu’ haykyuw ana nanu’, kruma’ ga lukus, kruma’ ga nniqun. nanu’ qu urungku’ ru abura’, miruku’. nanu’ yasa qu pzyuyx iyal squliq musa’ pbiq kya. nanu’ yasa qu musa’ kya ga siga pbiru’ lalu’ gi aki’ nha’ baqun maha “ima’ qu wal magal, ima’ qu ini’ agal na’.” nanu’ yan nasa lru kya qu wayal pbiq haykyuw lga, mutu nha’ halan kmayal ke’ na Sesyo’ ru aki’ nha’ baqun maha “qani hya’ ga kahul sa gnalu’ na Utux kayal, ru yasa qu ’ringan na sinzya’ naha’ la”. nanu’ smnhi’ kya uzi qu mama’ mu Yukih.

nanu’ qu smnhi’ kya ka squliq hya’ ga, nanu’ siga musa’ sinriy ha, gi iwan musa’ pqwax sa kinqihan nha’, ru aring kya qu mgsinzya’ na Tinskyuw la.

aw ga kya qu musa’ psinriy ga, si ga baqun nha’ balay qu nyux nha’ s’usa’ sinriy gi yaqu qbaqan nha’ maha kahul sa inlungan nha’ balay qu musa’ smnhi’ kya. ru pqutan nha’ ru baqun nha’ balay smyuk kwara’ qu ke’ na Sesyo’ lga, yasa qu psinriy nha’ kya la. ana su’ si say gi yasa qu Gaga’ na musa’ smnhi’ kyokay qani.

nanu’ qu mama’ Yukih hya’ ga, rasun na ’laqi’ nya’ musa’ psinriy, ru pqutan na Singxu’ maha “ ima’ lalu’ na Yaba’ ta’? ” kmal mama’ Yukih maha “ Mbuta’ ” maha, ga inlungan na singxu’ hya’ ga nyux nya’ aki’ psbaqan maha “aki’ thuzyay psinriy rwa.” kyalun nya’ lawzi maha “ iyat qasa, ima’ lalu’ na Yaba’ ta’ kwara’ minqyanux babaw ’uraw qani maha saku’ ” ru syukun na mama’ Yukih maha “ Mbuta’ balay. ” ini’ hawh uzi qu Singxu’ ru pntringan nya’ na tluling qba’ nya’ maha yaqu Yaba’ ta’ Utux kayal, ga ini’ ginhzyay uzi qu mama’ Yukih, ru kyalun nya’ maha “ ini’ su’ baqi isu’ Lkmbuta’ balay. ini’ su’ baqi ga hali maqut Yaba’ mu. ” sawn nya’ qu singxu’, nanu’ balay wal ini’ thuzyay psiriy sa ryax qasa lru.

babaw nya’ lga wal balay thuzyay psinriy lma.

天主教剛來部落時，會送救濟品給需要的人，並向他們傳講聖經道理，好讓族人明白這是出於天父的愛。信仰天主教的人，都要受洗向天父悔改，才能成為教徒，為了確定信仰的真誠，要先接受問答。

Yukih叔叔要受洗時，神父問他：「你知道我們的父親是誰嗎？」Yukih叔叔說：「是故人Buta！」，神父不放棄，用手指向天，想要暗示Yukih叔叔是天父，可是Yukih叔叔還是固執的回：「不信你去問我父親！」當時Yukih叔叔沒能夠接受洗禮，據說，後來有成功接受洗禮。