朗聲四起

kil mae’iyaeh ma’onhael yako paka:i’ komoSa’ ’izi’ papa’aehae’ ka mae’iyaeh, kakaykayzaeh kil mae’iyaeh, ’okik nonak ’am Siyae’ nanaw, tatini’ ma’ ’am Sobaeh ’iSo’on.

ya:o So: ’ina tomilhaehael ka ’aroma’, ma’an hina’azem ma’ Siyae’ a tomal, ’isa:a’ ya:o ra:am ila kano’ koSa’en “tomilhaehael ka mae’iyaeh Sapang mina pakSiyae’ hi nonak!” ’ita’ ’ana ’inowan ma’ pakhingha’ ka hina’azem, ’izi’ karke:, ’izi’ Sa’i:i’, kakilwa’is pa’alroton ka ’in nonak a kaspengan. tatilhaehael hini ka ’ima kayzaeh howaw, ’izi’ i koSa’ ngabas nanaw ka pinayaka:i’, nakhini ’ana koza’ kin ’aewhay kapanra:anan ma’ ’am ’okay tikot ila.

yako ray tilibi: komita’ ’aehae’ koko’ kamatibae:iw ka tatimae’. siya tibae:iw ka tatimae’ 19 tinal’oemaeh kin honaehnge:, ’aehae’ hahila: ka sasi’ael pawka’ 100 rayhil nanaw, papi ’am tomilhaehael ka mae’iyaeh makakreng a tomal tikaehaw. kakhayza’an yaba’ nisiya ’oka’ ka rayhil nom pakita’ ka sinsang hi ’oya’, ’isa:a’ ’oya’ masay ila. siya taSilotor ni ’oya’ ka kapatawawen tibae:iw ila ka tatimae’, tikaehaw malahang ka minayti’, ’okay kiSka:at ila ma’ ’okay hinra:iy. ’oka’ o, nisiya roSa’ minayti’ kamamanra:an maySoSowaw masay saboeh, siya hopay a tomal ka hina’azem. siya ra:am ’oka’ ka rayhil hopay a tomalan, ’isa:a’ siya kayni’ komita’ So: hiya’ ’oka’ ka rayhil pakpaka’alo’an ma’ rima’ ila tomilhaehael ’oyaeh.

siya ra:am komoSa’ tatilhaehael ka mae’iyaeh kayzaeh ka hina’azem pakSiyae’ hi nonak. nisiya pinatawawan rokolon, ’ana Say kabih no wasal ma’ ra:am ni siya ka pinatawawan. ka raro:o’ Siparpe: ray “’isahini ’ima tomal a tomal ka mae’iyaeh” kina:at.

hayza’ ka wa’is tomilhaehael ka mae’iyaeh ’ima kayzaeh ka kaspengan, ’izi’ tikot ’aybolen, ma’ izi’ ’inhaehae:oe’ noka mae’iyaeh ka kinSobaehan, manga’nga’ ka pinatawawan nonak ma’ ’am kayzaeh ka hina’azem. So: homawan ’okay karke: matawaw no saboeh, mita’ kin’i’iyaeh ma’ ’am kayzaeh, ’okay pa’oe’oe’, ’okay SahowiS.

komoSa’ ’am tatilhaehael ka mae’iyaeh ’izi’ ngabas nanaw, ma’ ’izi’ ’ayna:a’ ka rinokol a ’iyatil’itol ka raro:o’, nak homawan. ’ana nak’ino’, ’ana ’inowan tatilhaehael ka katilhaelen, ’isa:a’ ’ima haeba:an ma’ ’am kakaykayzaehan, mita’ kin’i’iyaeh ’am kayzaeh a tomalan!

善待他人，不僅自己快樂也會得到福報。所謂的「助人為快樂之本」。有能力就不吝於幫助別人，將此想法傳承下去，不只是口號。有位阿嬤，每天賣菜19小時，生活費僅100元，爲了幫助他人，努力工作。她賣菜，照顧家人，放棄學業、婚姻，她知道沒有錢很辛苦，不希望看到有人為錢所苦。助人為快樂之本，她的善行為大家所稱頌，榮登時代雜誌最具影響力人物。助人為善，內心充滿喜樂。助人非口號，也不為爭取名聲，以平常心看待就會得到滿足。希望大家都能時時助人，讓社會和諧，大家快樂。