朗聲四起

noka to’oya’ kina:at komoSa’ SaySiyat ’am ’oka’ ila nanaw ka kapayaka:i’. kamamalahang ka SinSinrahoe’ to’oya’ komoSa’ ’am tomil’itol ka kapayaka:i’ pinatawaw ma’ hayza’ lampez o hayza’ tinal’oemaeh ila. ’oka’ o, nasiya pinatawaw pakhinghingha’en saboeh, ’okay koSa’ SaySiyat ’okik hingha’ no ’aroma’, ’ititi’an nanaw ka mae’iyaeh ra:am malnoSaySiyat. ka rayhil nom tomil’itol kapayaka:i’ bino:ay ma’ pakhingha’ saboeh. takhini’in ma’ haysiya haSa’ malnoSaySiyat. ’isa:a’ SaySiyat nonak hayza’ ila koSa’en ’am tomil’itol ka ka’alnoSaySiyat kapatawawen.

yako SaySiyat! ’ita’ ’am nak’ino’ tomil’itol ka ka’alnoSaySiyat? ma’an hayza’ piza’ ka kinita’ kapanpanabih.

ray taew’an malnoSaySiyat kayzaeh a tomal, nakhini ’am ’okay papazeng ka kapayaka:i’. ray taew’an mina ’isa:a’ ’ima kayzaeh kaptatoroe’an kapayaka:i’. korkoring lomoehloehay ka ka’alnoSaySiyat ni ’oya’ ki yaba’ howaw. rengreng kil korkoring malnoSaySiyat, ka korkoring ma’ malnoSaySiyat. ray ’asang ’aeh’aehael malnoSaySiyat saboeh, korkoring malnoSaySiyat rokolon. tatini’ Sapang ’ima kayzaeh a tomal kaptatoroe’an ka ka’alnoSaySiyat.

’aroma’ somingozaw Sa’, mita’ ka’alnoSaySiyat hawka’ ’am kayzaeh ay? ’ita’ ’am hawka’ ka kano’?

kapayaka:i’ papazeng ila, SaySiyat ma’ ’am hawka’ ila! mita’ kapayaka:i’ ’iwan hapoy kataSilotoren noka minahael. korkoring ’am hawka’ kaptatoroe’an ka’alnoSaySiyat, haSa’ ila maehrahrang kil tatini’, ma’ ’oka’ ila kakSekla’en ka kaspengan.

tatini’ kil korkoring ma’onhael kiSka:at ka kina:at noka SaySiyat , ray taew’an kakrangi’an parpe:en ka kina:at noka SaySiyat. rengreng kil ’ima ra:am malnoSaySiyat tatoroe’. rengreng malnoSaySiyat pa’inrowa’ ’in nonak a ’ima ngota: maySoSowaw ma’ ra:am ila. komi:im ray tiyanaw hayza’ ka kaploehloehayan ka’alnoSaySiyat, komita’ ka tilibi: ki bazbazae’ ka ka’alnoSaySiyat.

ka’alnoSaySiyat noka tatini’ Sinbilan, siya noka SaySiyat kin’i’iyaeh, kaspengan ki kinra:aman. kakSekla’an nonak kil SaySiyat ’ima hingha’ ramo’ kak’i’iyaehan. So: pawka’ ka kapayaka:i’ kaspengan ’ana kano’ ma’ hawka’ ila. ’ita’ saboeh ’alnoSaySiyat ’izi’ pakpazeng!

賽夏語被列為「嚴重危險」即將消失的語言，於是啟動搶救計畫。

如何搶救族語？

家庭是學族語的最佳場所，傳承族語是父母的責任，鼓勵常說族語。在部落，大家都用族語，小孩也用族語。

族語流失很重要嗎？

族語滅，族群亡！族語延續族群的火。小孩無法以族語和長輩交談，也失去族群文化和認同。

全家一起讀教材，物品貼上族語標籤，跟精通的人學習。尋找教學網站，看族語節目，聽族語廣播。

族語是代代相傳的語言，包含文化習俗，也是連結自己與民族的重要脈絡。