朗聲四起
ta sicuayan, qadaw a tjasikeljangan tu kadjamadjaman, tu kincengeljan katu seleman anga. nu maledep a qadaw saka miseleman, qezemezemetj anga aya itjen. ljakua seminamalji a naqemati a Cemas, izua qayaqayam a pinavayan tua caquwan a kisaseljang ta qadaw a zemaing, satje keljang tu makudakudanga a zikang.
djemedje ta kadjamadjaman pa’e’e a kuka tu tjasikeljang tu maljialjianga. ayatua tjuruvu a paquziquzip ta kuka i qinaljan, manasika nu maljiya temalidu aravac a sizaing na kuka. izua nguanguaq, izua inika nasesazua a sipa’e’ean, namaya ta kicaquaquan a pa’e’e.
nu i vavuwa sa uri kincengelj itjen, lemangeda itjen tua zaing nua tjikurai. liyaw aravac a tjikurai i cemecemel, nu zemaing a ita, isaseljang a matjatjuzaizaing a tjikurai, namaya tua semenasenay. nu pasamasulem mumalj uta zemaing, ljakua inika amin a tjikurai izuaza zuma a qayaqayam uta a kitevelj, namaya tuazua sulailaic a cugaw.
aicu a cugaw inika namaya ta tjikurai a tjengelai a remagadugaduan. aicu a cugaw tjengelai tua sulapelapelj a kadjunangan katua ljauljaungen a veljeluan. nu izua tjaquma i djemetj ta veljeluan, cugaw a tjasikeljang tu masulem anga. saka nu lemangeda itjen tua zaing na tjikurai katua cugaw, patagilj anga itjen a mirava tua tja nemanga satje vaik a semaumaq.
ljakua nu tjeseleman itjen, zaing na ljequ a kemacu tjanuitjen a semaumaq. aicu a ljequ namaya tua zuma qayaqayam, nu zemaizaing a ita zemaing a kitjavililj a zuma a ljequ uta. pai mavan cu a tjasipatjanemanema tutja levaan tjutja samaljiyan tua inalangan na Cemas, a sinipagaugaw tjanuitjen ca bulai aravac a i kacawan.