朗聲四起

neni sua “Pasikarai”? tia nukanmana? tia makananu kaisisi? soni parʉ’ʉna kita poisua isi.

tanasʉn mita, ’una cakʉran Namasia. ’una pa cucumeni ’itumuru nungnung. cecenana noo matarava cu kasʉpatʉ vuanʉ, nukai karima vuanʉ, mesua ia vutukuru, ’arasakai mataa ’apasʉ muruvʉnʉ tamna kanasia. miana tamna niurina, mesua Kanakanavu tarasangai pa parivutukuru. tia cu mati’arangʉ tia siarupaca kaisisi nonoman. makai vʉra, ’aramʉ, pa’ici vina’ʉ, sapuarʉ, ranʉngʉ tavuruku. sua tia siarupaca sapuarʉ ia, mamanʉng sua vo’orua. noo tiain ’urupaca cʉngnan cu ia, tia pa singsingiʉn, matarava ’akia cu sauvu. noo makasuin kani ia, ka’anʉ cu tia parakicacʉ vutukuru. sua tia siarupaca ranʉngʉ ia, tia mata’ʉ kavangvang. sua tia siarupaca kaisisi ranʉngʉ ia, ’akia sua ’urupaca maringuna cu ranʉngʉ. tia kita matangiri isi.

matarava cu taniara Pasikarai. miaa koo pa umoni tarukuka, kavangvang sasarunai Kanakanavu, tia cu mucʉmcʉm aramia’ʉ, mukusa nipatangara ra’ani matacuvucuvungu ’inia. noo mapurupau cu kakangca, masicani mamia ra’ani makasi, “taa cu” misee! kipapa kavangvangcau sasarunai mukusa cakʉran. tikirimi niaratumuru canumu, mon na cikiringa ’inia matu’apuru. noo murungarʉ cu ’apuru ia. kaisisi cu ’inia ’ʉrʉvʉ. matirupangʉ ’ʉrʉvʉ, tia cu pokarikari ra’ani. kari ra’ani mesua ia, tia musu’ʉvʉ na kakangca, ’ʉnʉ’ʉnai mita mataa cakʉran isi. marivivini tia pa posisini! paka’intasʉ cʉpʉngʉ sasarunai.

masirupangʉ ra’ani, pakasiʉn cu kee mamarurang, sumasʉmʉ’ʉa cu vʉra! vʉra isua, tia pitakusʉʉn na niaratumura canumu. sua nanmarua ia, tia cu marivici sapuarʉ, capuku mataa tavuruku. aranai na rocu, ’apu’iarʉ ’apuca vutukuru mucara. vanai sii, kavangvang vutukuru, ’una masiraru nguain tamna to’unaa muruvʉnʉ. noo ’unain ’inia vatu tatia nukai cacan, tia pa uranʉn vutukuru makisavangʉ ’inia.

kari mamarang, tia kaisisiʉn sua cakʉran. uranʉn vutukuru. tia musu’ʉvʉ na kakangca mataa ’ʉnʉ’ʉnai, manasi marisingsing kitana, matarava nuari. ’una mamanʉng to’unaa cau aracʉvʉrʉ. sua isi ia nguai sua Kanakanavu tamna Pasikarai kisʉʉn.

什麼是Pasikarai（河祭）？何時進行？如何進行？有何涵義？每年到了四月份或者五月份，是魚兒、蝦子及螃蟹要產卵的季節。依循傳統在那個時節就暫停捕魚蝦，要準備儀式的器具。進行河祭的日子，男士們都要去尋找有深潭的地方，在河邊起火。由首領及祭司進行儀式後，要謝天、謝地以及感恩這個河流的養育。最後要進行威震的動作！要讓男士們提起精神。老人家說，要祭拜這些河流，要感謝天及河川。這樣才會受到祝福，這就是卡那卡那富族的河祭。