朗聲四起

maghaghap cku’ qutuxqutux na’ kakian nku’ Itaal ku’ lubu’. kumaal ku’ nanabakis cku’ waw na’ lubu’ maha’, bali’ nanaq a’ papaquwasan, yani uwi a’ quwas ru’ papakitalan cku’ siwaan ini ga kisiliq na’ mukurakis kinku’ mugumalaq ka’ lawlawkah na’ Itaal.

kinbalay na’ buwiqa’ ku’ lubu’. ini ka’ayhung ’i’ umiyup ku’ lubu’. sipaglug cku’ quwas nku’ Matu’uwal ku’ lubu’. balaiq pungan ru’ mananananaq ku’ hanang niya’. mananananaq ku’ lubu’ cubalay. kahi kiya la ku’ yugi’ na’ lubu’. gumlug cku’ quwas ’i’ sumayu’ cu’ lubu’ ru’ lumiliq cu’ kukuy ku’ mukurakis kinku’ mugumalaq ka’ lawlawkah. papausa’ ku’ kai’ ga asiki makasawbih ’i’ kumaal ku’ itaal. yani kiya la cu’ gaga nku’ kakian. tikay ku’ hanang na’ lubu’ kahi masikura’ kahabaag ku’ itaal. yani masibalaiq la ku’ mukurakis kinku’ mugumalaq ka’ lawlawkah.

payux tikay ku’ kinbalay na’ buwiqa’ ka’ lubu’. hma’ na’ lubu’ ga, sikabalay na’ tihi’ ru’ gkugan ku’ kaciyuciyu. bahlan na’ siniyug la. umiyup ga asiki’ paskalgi ku’ siniyug. pasihuban ru’ yupan la ga payux ku’ hanang niya’ la.

balaiq nku’ Matu’uwal ku’ tilubu’ ’i’ musa’ ’i’ sumbabalaiq cu’ mukurakis kinku’ mugumalaq ka’ lawlawkah ru’ manhahiyu’ ’i’ makal na’ lubu’. umiyup cu’ lubu’ ’i’ sumayu’ cu’ makaal naki’ baqun na’ mugumalaq ka’ lawlawkah ru’ mukurakis. kiya ku’ kai’ cu’ buwinah maha’ kiya kumaal cu’ kai’ na’ masical.

ukas ku’ lubu’ ’i’ cunga’ na’ ga, wung! wung! maha’ ku’ hanang na’ lubu’ ga balaiq ’i’ pungan cubalay. asikina ga, malakam, qumaluwaap ru’ aruwa’ ku’ itaal ga ini cubalay ’i’ umiyup cu’ lubu’. tiku gaga’ nku’ Itaal cu’ cunga’ maha’ ku’ nanabakis.

asikina ga ini kapayux ’i’ tilubu’ ku’ Matu’uwal ka’ hani la. kiya’ tikay na ku’ nabakis ka’ humaynas cku’ maymal cu’ kaal ’i’ baq ’i’ tilubu’ na. ayhung cubalay san na’ kinabahan nku’ Matu’uwal ku’ musa’ ’i’ makibaq cu’ tilubu’. musa’ ’i’ sumbabalaiq na’ lubu’ ku’ mugumalaq ka’ lawlawkah ru’ mukurakis ga, tatuhi’ cuqang maha’ ku’ kinabahan nku’ Matu’uwal uwiy. makaquwis ru’ makababaw na’ rawq cu’ sawni ga, ara’ruwa’ ’i’ mapawng ru’ maputing la ku’ gaga na’ Itaal. kiya ku’ papatiqan ’i’ pasibaq cu’ lubu’. muwani la ga yani balaiq lumuhing ru’ sumilhu cu’ gaga na’ lubu’. babaw niya’ la ga kii’ pakakiya ku’ giqas na’ gaga na’ lubu’

口簧琴分布在泰雅群的區域，它不只是樂器和音樂更是表達愛慕或宣洩情感的語言。

一面吹奏一面隨口簧琴節奏踏跳。音量雖小卻特別顯出迷人的風采。口簧琴中間為金屬或簧片，另以細麻繩穿越，吹奏時用口腔含住簧片，以右手彈線，吹吸之間產生不同音調。若在狩獵、喪事期間則禁止使用。