朗聲四起

sua Kuatʉ ia, iku tamna mastaan mamanʉng tangria. aranai miaa kuosiau, arakukunu cu kim marisinatʉ. nakai ’apaco’e manʉng tangria, ’apanapa ’una pa’anungua. paira noo nima’anungu cu, patuturu kim maraini misee. makasua pakacʉmʉrʉ katangria tamna cʉpʉngʉ.

’una ucani taniara, tia kim kiatuturu kari Kanakanavu, mesua tia sikingi tumatimana mataa marisinatʉ. niroimi Kuatʉ marivici siarisinatʉ, mapinipini sumasuruvai ’ikua siarisinatʉ. vanai sii sua Kuatʉ ia tangria maku manʉng, maramʉ ku mastaan mamanʉng siarisinatʉ ’apasuruvai ’inia. turupang sikingi, nimaroka siarisinatʉ misee sua nguain. tikirikirimiʉn ka’anʉ mʉtʉa, cucuru ’akia cu! musu’ʉvʉ ’ikua makasi: “cucuru maraini! niparoka maku siarisinatʉ musu…, nakai tia ku mai’i kasua ucani vo’orua” misee. tumatimana ku nguain tamna kari, surumu ku arasurutu! mesua aka kari maku makasi: “niparoka musu siarisinatʉ maku, mupupangʉ maraini misee mamia, manʉng kara makasia?” arakuracʉ kangvang sua Kuatʉ makasia: “musu’ʉvʉ cu ku kasua, tia pa ku mai’i vo’orua siarisinatʉ, tia pa ku makananu?” marivari ku: “puaka ku kasua!” maucʉng Kuatʉ koo cu pokarikari. taniara mesua, ikim tassa, aka kavangvang cʉpʉngʉ mia. ka’anʉ cu tʉni matimanʉngʉ tumatimana takituturua tamna kari.

tarasangai kiatuturu, arapana’ʉ Kuatʉ iavatu, movua ’ikua ucani vu’a. putuvʉrʉkʉn maku cumacʉ’ʉra, ’una ucani vo’orua siarisinatʉ, ’una pa ucani cupina sinatʉ, marisinatʉ ’inia: “cucuru maraini! niparoka maku siarisinatʉ musu, atiumao siasu’ʉvʉ maku!” ’esi na ciciri mesua cina, kesoni ’ikua, miseni makasia? makasi ’ikua cina: “sua tangria ia, tia ’aparuranʉ, musu’ʉvʉ cu Kuatʉ, mai’i pa vo’orua siarisinatʉ. koo nguain matangiri ’aparoka ’inia. mataa tia pa kasu musu’ʉvʉ aka kari musu.” akini taniara, maka’ʉna cu kim aramanʉngʉ, makai miaa campe pa.

arakukunu kʉkʉnang marisinatʉ. cucuru ’apanapa ’una ma’anungu, ’apanapa ’una parapusu, nakai tia paruranʉ, tia pasoso’e, tia putucʉpʉngʉ. makasuin ka’anʉ cu tia miakaka tangria tamna cʉpʉngʉ, tia kamu arasurusuru katangria.

我和Kuatʉ從國小起就是很好的朋友。有次族語課是聽寫考試。Kuatʉ忘了帶筆，急忙地向我借筆。因為是好朋友，我挑了一支最好的筆借給她。考完後，筆竟然遺失了，很抱歉地說：對不起！把你的筆弄丟了，我會還給妳一支新筆。我莫名的生氣！妳把我的筆弄丟了，隨便道個歉就可以嗎？我討厭妳！Kuatʉ沉默無語。媽媽對我說：朋友之間要互相幫助，既然Kuatʉ道歉了，她是不小心弄丟的，妳應該原諒她，你該為你無禮的話向她道歉。第二天，我們和好如初。