朗聲四起

“capici cimʉrʉ, kumakʉnʉ cimʉrʉ. capici ’umi kumakʉnʉ ’umi”. imua ’esi na karanana to’unaa, arapiningi musutampʉ ’inia kumakʉnʉ tamna mungka. poisua kʉnʉa, cucuru tia purangrang sua Kanakanavu. vanai sii saihu Kanakanavu kamanʉngʉ kʉnʉa. paira maka’uarʉ mamarang mita makasi: “sua tamu’iarʉ cau ia, ka’anʉ ara’akia kʉnʉa”. ’itumuru ikita tamna sa’o’o kʉnʉa.

cunuku. Kanakanavu tamna cunuku ia, ’una uturu karanana sikamanʉngʉ. niarupaca parai marikʉrʉ ia, pepe kisʉʉn. sua mastaan mamanʉng pepe ia, tia musutampʉ matanʉkʉcʉ, tia tapunia takupiripiri. tiuruʉn ti’ingi ’umu tanare, isua ka’anmana mamanu muarʉ kʉnʉa. ’una pa cunuku, nisʉ’ʉa tammi nukai tavʉnʉvʉnʉ. matʉa tia pa pociriʉn, punganganʉn cu marikʉrʉ. kuvucʉrʉkʉn mataa maraa ka’anʉ marua. musutampʉ ariviciʉn muraceni. imua, noo ’unain kincaua rovʉvʉ, nukai tia miaranau taniara aracakanʉ, paira marivici cunuku narangʉ. cunuku pacamai ma’akasʉ vutukuru, ’aramʉ, cucuru kani musutampʉ.

cau Kanakanavu, tukupecu manmaan niaranai na canumu marʉkurapʉ. ’inmamia ararira mataa vunai, sua cucumeni ia camai Kanakanavu kavangvang. ’una pa na cakʉran kunamʉ kisʉʉn, cucuru Kanakanavu manmaan isua. poisua tia mara kunamʉ, cucuru Kanakanavu ’urucʉpʉngʉ. tia ’apaica kanasia, to’unaa, tapasʉ, sikatatia, ’apu’iarʉ maramʉ. sua cucuru saihu ia, paira noo campe araciasʉ, koo pa arapipiningi taniarʉ, mukusa cu na tʉsʉkʉ nungnung mapʉnʉ. sii mesua tamna kunamʉ mastaan mata’ʉ. po’ucipiʉn ’au, punganganʉn ti’ingai pa ’arasakai mataa vutukuru. ’au makasua, macaro, ka’anʉ mangirisi. imua “’au pamanʉngʉ tina’an” kisʉʉn mita.

靠山吃山、靠海吃海。住在不同的地方，就會發展出適合當地的飲食文化。說到吃的，族人不免就會得意起來，因為族人對吃的很講究。水中川苔是族人的最愛，川苔的採集，依季節、地點、色澤、大小等仔細挑選，老練的族人會選擇天剛亮、太陽尚未昇起時到乾淨的溪流採集，配小蝦、小魚煮成羹湯，滑嫩、無油脂，稱之為「健康湯」。若對長一輩的老人家說要請吃米糕，有鹹魚、鹹肉、川苔蝦蟹湯，老人家會面帶喜樂的表情說，那就快點啊！