朗聲四起

asuwa driya kadri drekall, adri sadru a tiyam. kadruwan na muwauma. an muka i tiyam tremimaa dra iyam, dra tuwami i, tu drulunay dra lumay, dra beras, dra buaw. likudran i, kadruwan na trau na kemay i sidrumayan. nantu aekanan dra trau i, sadru a kirekameni. muka tremimaa dra manay i tiyam i, adri lla dremadrulun dra lumay dra beras aw beray dra paisu.

na tratrekelan, na aekanan, na pamanayan lla i, payas tremima aw tremekel mekan. na tuwami, na tinallek i, tu pusabakaw kana babiasan dra dinki. garemay i, tu pupatraranaw aw payas ta mekan dra biniasan dra tinallek. salaw kalleayan a trau garem.

asuwa driya, muka kemawiya a trau purebu demeru dratu aekanan. garem i, padepe dra dinki. purebu dra gas demeru. asuwa driya na trau i, tremima dra binekeran aw patrai kana mitrepa tremai dra kiruwan. garem i, payapayas tremima dra kiruwan. ullaya na belakas barellabillan. ullaya na lliketri kurenau tu tiyall. nadir na aekanan, na tratrekelan, na kiruwan i, marekamenimeni tu pinungaladan dra bekalan.

na maaidrangan i drekall i, adri malladram marengay kana ngalad na bekalan. an maradruk trematrekel dra eraw i, tu pakarunay na llallak patrima dratu auri kana eraw. na druma i, trimaan ku driya dra “pespes” kema. amanay idru na “pespes” tu kayaw i, tu panauway kana tinutrabatrabak na midrarang na kulisepa. na druma i, tu puisatraw tu lima na saya, tu pudareaw pulikudran tu lima na saya. uwa trimaan ku kana kemadri kema i, amau na su-paw.

na druma i, uwa kana adri emaebut kantu llawllaw na “sibun-ilibun” kema. amanay idri tu kayaw i, idru na “ting-tong” kema maruni an musabak an mupatraran na trau i! driyama tu pungaladay kadru dra “ting-tong”. kasaerueru tu pinungaladan kana maaidrangan garem.

 kadamadaman i, uwadaway driya a bekalan a pinungaladan. na llallak i, saigu temaraballaka. tu paladamaw na maaidrangan dra bekalan dra ngalad. adriya kemadru mataralalima pungalad. na llallakan i, kemiyangera dratu kallalladraman dra maaidrangan marenay.