朗聲四起

niaranai miana miana miana tamna ’ʉna. ’una tacini nanmarua nanakʉ, koo pa muru’ucangʉ. aranai miaa tati’ingi pa, tavarʉ’ʉ cu takacicini pacʉpʉngʉ, nenei tia putukioa. cucuru tamu’iarʉ paira mucʉmcʉm aramia’ʉ, marisiki tanasa, miuru po’ucipi tia kʉniʉa. tanrara’ʉ nguain tamna mamarangʉ cumacʉ’ʉra ’inia.

ka’uma nguain na ciciri nungnung, pacʉpʉngʉ tia kani mon ’inia rumarapʉ vina’ʉ. namasʉ ’ʉnai ia, tia umʉkʉn kee tammi, tanʉkʉ, tammi karu, nʉpʉnʉpʉ nukai tʉvʉsʉ misee. makasua cu, matianai tumatakʉtakʉ rumanamarʉ cʉnʉ. miaa ’esi kumakurai ia, ’una niaratʉmʉ ’inia cʉnʉ kara? cipunu kara? karu kara? ka’anʉ pa tarakanangʉn, koo kee ravisiʉn. pacʉpʉngʉ! makenanu mon ’inia aracʉvʉrʉ, ka’anʉ tia miakaka cucumeni nimʉkʉa.

makasua cu aratania, tumavungavung, makamacu’u cu. cʉ’ʉrʉʉn nanakʉ isua, nguaiava tavu sua macu’u. kasakʉnʉn kee miacara. ukusʉʉn kee cumacʉ’ʉra mavangʉ cu kara? tavacuku pa capai ka’anʉ pa mavangʉ. koo siapeni maka’ʉna ’acu ’inia cumacʉ’ʉra, pasikʉcʉn kee! mavuca’ʉ pa! koo pa marirupangʉ, pui’i na tanasa.

maca’ivi cu cani tarasangara. maka’ʉna mukusa ’inia cumacʉ’ʉra, tanavikarʉ cu, pasikʉkʉcʉn kee! makʉkʉang cu. apʉnʉn cu kee marivici tanasa. nisʉ’ʉ kee na tomarʉ, koo miaranau arivariʉn kee na tarikʉra, sii tia ’apuciriʉn kee, nakai miravuku. maka’ʉna arivariʉn na nakʉnakʉ tatarʉ, matʉa pa miravuku! marivivini, aravariʉn cu kee na tatarʉ, ka’anʉ cu miravuku.

totasiarʉ, mucanʉ nanakʉ mukusa ’uma. cani taniara mo’uma ’inia. pui’i rovana, cʉ’ʉrʉʉn kee na tatarʉ, ’una tacini nanmarua sarunai tinipuru ’inia. ’apaco’e campe pa tassa ’arupacʉ’ʉra, nakai makai kani niaranai miana masiraru tarakanangʉ cu. koo miaranau muru’ucangʉ cu tassa. ’una ucani taniara, uranʉn nanakʉ sua sarunai kumakucu navungu in. cʉ’ʉrʉʉn nanakʉ, ranukanuka sua navungu sarunai. kesoniʉn kee sarunai: “miseni ranukanuka navungu musu?” marivari sarunai: “ikasu miana paira masikʉkʉcʉ ’ikua!” sua niapʉnʉ kee tavu isua, koo cu arapipiningi.

有位少女在溪谷旁開墾田園，想種小米、地瓜、芋頭、木薯、豆類等等。耙鬆土地時，發現地上長著不知是草、蔓藤或是一般的樹木？當時看不出來，並沒有拔掉，就讓它長大、開花、結果。最後長出的是葫蘆瓜，她常用手捏，發現還軟軟的沒有熟，過一個星期，有點變黃，捏不動了，就摘回家。某天晚上回家，屋內有一位年輕的男士坐著，雙方似乎舊識熟稔，沒多久兩人就結婚了。有一天女生問，其頭上為何有瘡疤，男生回答，是你以前一直捏我的。