朗聲四起

Tupa dau ka matataiklas tu, asa ata bunun tu nitu misbu mapasnava. Maszang masanglav tu ilu’ un, masinahaan imuut sinasput, mastaanang ismuut tu masanglav daingaz; maaq a kuli un a maisnahaan danum tinas’i, a mastaanang danum tu makazhav daingaz. Maqtu a lukis pin’uniun ladung, maqtu a ngula’ pin’uniun via, maqtu a hikuki ihaan diqanin kusbabai, maqtu a qatu mudadaan ihaan danum daingaz. Mavia tu namaqtu aingkun minsia i? Aupa nitu mimisbu mapasnanava.

Maaq dau mapasnava a, asa mililiskin tu, tis’uni bunun kuzakuza, duuq i katas’a ka is’aang? Pasukaviaz bunun, duuq i mapalatuza ka is’aang? Isnavaan i masnanava, duuq i kuzkuzaun mita?

Nitu minkalapat munludundaingaz a, nitu niap tu sikaskuaq ka diqanin kaidaqvasan; nitu munhaul haan vanglaz a, nitu niapin tu sikaskuaq ka dalaq a kaikatpalan; maaq i nitu tinan’a istaiklasan bunun tu sinpasnanava a, nitu niap tu sikaskuaq a taiklas tu kaiqansaipan. Maaq a uvavaz’az tangis a maszang a qalinga tan’aun, mindaingin a, vaivin intaa ka iniqumisan, aupa mavaivi intaa ka sinpasnava.

Anatupa aak tu tastuqanian mililiskin, a nitu makusia maputuq tu zikaang mapasnava, nii a inilikinan naaka mima’az. Haiza bunun a mindaungku saduu, mavia tu nitu munhaan madaqqvasan saduu i? Ihaan ata madaqvasan makadangkaz, na usaduan a bunun mita. Maaq i luklas a, pakilaviun a sin’ava luvluv ta, maqasla ka qalinga tan’aun bunun. Haiza bunun mapiqa a, maqtu aipa nitu mal’uu tunlaihlaih mudadadaan; haiza bununa nitu maqansiap linqaul a, maqtu aipa tunqatu, tasban i danum daingaz.

Haiza dau ka luqi a kasinuk, kaihadun haan puspus padan, minsuma qaana luvluv daingaz a, muqalqal a sinuk, musziq a sinatua. Nitu tupa tun ii a sinuk a masihal, tisia tu nii a sinuk a maqtu ita’un matas’i. haiza tas’a lukis, ihaan ngitngit tal’ia, madauqpus istaa lamis sauhaan hungku nastu. Nii istaa lamis madauqpus, tis’uni tu ihaan aipa ngitngit a tal’ia. Haiza maduqlas mahasum tu hanan ihaan misqang taaq tal’ia ka, uka bunun mushu istaa, siza istaa.

Paqpun, asa ata bunun tu kilim i kasihalan tu dangi’anan miqumis. Maaq aipi a sintupa tu asa tu mapasnava ki masisihal tu sinpasnava. Maaq i pasunkaviaz i masisihal tu bunun a, naminmasihal ata amin; maaq i mumshu matataiklas tu bunun a, namintaiklas ata amin.

智者言，不要停止學習。不登上高山，就不知天有多厚；不走下河床邊，就不知地有多厚；沒聽過智者之言，就不知智慧有多深廣。孩子的哭聲相同，長大後生活習性不同，這由於是教育有所不同的緣故。站在高處，別人會看見我們。我們聲喊的時候，聲音隨風送去，別人很清楚地聽見聲音。跛子可以搭車到處遊動，不會游泳的搭著船橫渡大水。

我們要學習善行。與好友相交，我們也會變好；我們靠近智者學習，我們也會變成智者。