朗聲四起

Maaq ata miqumis a, asa tu mapasnanava, na tudiipin ata minqansiap.  Laupakadau ata ihaan pantu’ tikis isnava’an i sinsi. Vaivivaivi ka na ispasnava imita’an. Haiza malasTauluu, haiza isisipul tu qansiap, haiza tusasaus, haiza pismamali.

Na taqu aak inaak inisnava’an tu lainiqaiban: Qabasang a, niang papia bunun vinkiu, nii amin mazima mapasnanava, kan’anak miliskin tu napiqauq kuzakuza. minTauluu’in a, ma’insuma’in a Sasaipuk Sasbinaz mapunkaku’ mapasnava.

Maaq i isnavaan a, asa tu manungsiv tan’a isia sinsi tu sinanava’, nitu listutudul, maaq i nitu itqaqaal a, asa tu masingav i sinsi. Aupa na uqnaunang ata masnava.

Mahaipi ata panpungul, isnavaan laupakadau ka, maqansiapang tu maaq a sinanava sinsi ta, unisin a panpungulanin. Paqpun asa tu kasa’an mapala ihaan imita bungu. Maaq i isnava’an haan qanian a, usuqaisunang mita masipul miliskin,  biaqis panpungulanin. Katu maz’av mapasnava ki duma bunun, maaq i nitu ma’laz maqansiap a, sintupa dau tu niang usiza’an i qansiap ta. Paqpun asa tu mapasnava maqaqansiap tu bunun. Na tudiipin ata tutuza tu uqansiapan.

Kilim i asaun mapasnava tu qansiap, maaq mita kai’asaun a nitu mamasznag, maaq i nitu asaun mita tu sinpasnava a, nii ata mazima isnava’an, nii amin mazima mushu istaa. Paqpun asa tu ukiliman anak’anak kai’asaun tu qansiap mapasnava.

Asa tu maqasmav, katu mangai. Aupa maaq i asa mapasnava a, ni’in tupaun tu mataimang tu bunun. Asa sanavan aisabaqan tu sauhaan minaqtung tu vau tukii. Maaq i saduu ki tilivi, qaitmal i suci a, na maputuq mita ka aisabaqan, na tis’uni ata mavai a aisabaqan mitzaingu ka hubung, maaq i isnavaanin a, muqa’in ata susua, maaq i nii a listutudulin. Niin utan’aan sinsi tu sinanava, niin amin maqtu uqansaipan. Maaq i maun a, nitu itmangmang ki kinanal’ing tu kakaunun. Aupa namahaipi minqulpiq ka hubung, ansasuu tu namihalang a hubung. Katu masmuav quud  paidangi’an satuu madadavus tu ququdan, nanii a hubung maqatba. Maaq i isnavaan ihaan kaku’ a, maszang munququma tu bunun, mitmuqu amin a hubung. Maaq i masihal a hubung a, maaq amin a sinpasnava a namasihal amin.

生命中要學習，才會獲得各種的知識。從前，讀書的人不多，人們用自己的想法做事情。後來政府鼓勵我們受教，要我們留意老師在說什麼，聽不懂要提問，要反覆去讀去思考，避免遺忘。不要羞於請教，不慎理解，表示沒有獲得知識，只要願意學習，就沒所謂的愚笨。

睡覺時間容易疲勞，上課也會打哈欠、打瞌睡，聽不到老師的教導，也無法獲得知識。要注意飲食，避免油炸、含糖食品，身體容易疲勞也會發胖，有強健的體魄，學習的效果就越好。