朗聲四起

asuwa driya. uniyan dra sinsi dra palaladam kanta. daw maruwa ta marekainabanaba kurekasa? malladram ta dra kakakudayan kikarun dra manay driya. i manay na paladam?

an mirawa a maaidrangan i, adri patriyarebeng isuwasuwa driya. demaull dra nirumaenan druwa i ruma. semiyawa dra biabias aw tremekel dra eraw. “tu iyaberay dra Demaway, tu iyaalaw dra temuwamuwan.” kema dar.

an kadru a kasangalan dra nirumaenan aw i drekall i, adri muwasabak ella dratu inulitrungan dra maaidrangan na llallakan. an trematrekel dra eraw a maaidrangan i, kadru i saninin patakill. an adri marengay dra “trekel” kema a maaidrangan i, adri maaya dra takill dra tratrekelan dra eraw. idri i, tu migelayan dra maaidrangan. idri i, tu kakuwayanan i drekall.

kadru a saya wari. “na maaidrangan driya i drekall. nanta sinsi peniya.” kema i mulli na mainayan kanku. “na mainayan na llallakan i, kurenarenang menaunau dra amaamaan, dra baebaan aw meladaladam. na babayan i, kurenarenang menaunau dra inainaan dra baebaan aw meladaladam. a mainayan muka i trakuban aw i palakuwan kipatakesia. pallu dra mutubangesaran. na babayan i, kurenang dra emuemuan, dra inainaan, dra baebaan muka i dawadawa. malladrama dratu kuwadakudayan kirungetr dra ruma i sabak, dra kiyakarunan i uma lla, i drekall lla.”

adri tratrakaw dra manay driya. kaunaniyan yu dra alialian.

adri pararabas tremekel dra eraw. kakuwaatis nu dradrek.

adri katatuka. tibus yu uniyan dra mamanamanay.

taranapaw dra maaidrangan. seeran nu maidraidrangan.

matukutukudr ta marekasagar ta an maluwadiyadi ta. adri raranak dra paisu aw dra aekanan. simeu aw piyamamanay yu i likudran.

karayas kurenang dra llegiyan i drekall. inaba mullepus ta kakuwayanan na bulletrenganan.

“an kurekasa dra maaidrangan a llallakan i, sadru tu kinillengawan, tu ninauwan aw tu kinalladraman na wayway aw meladaladam. an maidrang nadri na llallakan i, tu kuwarenangan tu nananuwan dratu kiyaludusan.” kema dar i mulli na mainayan!

以前如有獵物，會邀請親友到家裡分享。慶典活動時，老人家要喝酒，年輕人隨側倒酒，年輕人不找杯子，這是尊敬也是規矩。

爺爺說：「長者皆為老師。」男生去少年會所、成人會所學習。女生跟著母姊學習持家、農務及部落事物。長者常常這麼說：不要欺騙、不要偷竊、不要嗜酒、不要偷懶。順父母、兄弟姊妹友愛、珍惜金錢食物、參與部落祭儀。爺爺說：「常與長者在一起，會增廣見聞，當年紀大時，是晚輩學習的對象啊！」