maulid ta dra munuma tu ikatratrina dra langitr? ulraya tu papalruwan nay? salaw bulay tu edad kana langitr. an numa i, tremangiya. i a kemadaw a wari. an numa i, emabuabu aw emaremeremeng. i a kaaudalr a wari. an numa i, midraradarang milanalanang aw bias na bali. i a maylralra a bariwan i! menau ta kantu edad kana langitr i, malradram ta dra kemudakuda na wari.

i langitr i, ulraya a marekamenimeni a kutrem. ulraya na kamawan dratu urip kana kuraw. ulraya na kamawan kana mubaba na aputr. ulraya na kamawan kana ba dra marepalrulruy. an numa i, aydri isatr. an numa i, mudare. an pakiyaanger na riwanes i, mupatraran muarak dar. aw mikiruwan kana marekamenimeni tu edad na kiruwan. salaw bulay!

an mutenep na kadaw i, mupatraran na bulan. kemirami i, kurenau tu katrung kana bulan. kana wawariwari i, marekamatrina aw marekasemenan. tu pasenanay i punapunan. an muketrep misama dra lruwatra tu wari kana Pairang. kandru na rauban i, matrina aw mutralatralaw tu trangar kana bulan. salaw bulay! kilrengaw ta dra batibatiyan i, ulraya a bulabulayan muwaarak kana bulan i sabak kema.

an dadaman i, kemirami marekamakiteng na bulan. palru dra mulrasadr paseket. adri ta lra menau. an masalr kana bulan dra pukapitu pukawalu tu wari kana Pairang i, mupatraran lra. amawna, marisan kana sedeng tu ikatratrina. kana wawariwari i, marekamatrina lra.

an aremeng i, ulraya driya a manay kadri langitr? a! ulraya driya a triur. aiwa i! a makiteng ku driya. kaadru ku i kadrekalran. adalrep dra drenan naniyam drekalr. kadru mi i babalu kureayaw. lreapanay na basulan aw migayang mi emaip kana triur mimi maluwadiyadi. alra i manay na marasadrusadru tu inaipan i! garemaremay merimat garemaremay maebut na triur. “nanku idrini” kema na misasa. “nanku idriyu” kema na misasa. maaraaraw mi. kasaerueru mi. 

an ta kiyangeraw i, sadru driya a manay driya kadri langitr maku!? adawilr lra dradru aw adri pakanau ta matra i!

不知道天空有多大、有沒有界線呢？天空的顏色很美，有時是藍色的，是個好天氣；有時灰灰黯黯的，要下雨了；有時呈現又紅又黃而且吹熱風，啊！是颱風天，看天空的顏色就知道天氣的狀況。

天空有各種各樣的雲，當彩虹想到的時候，它也會跑出來跳舞呢！穿著五彩繽紛的衣服，真漂亮啊！

太陽下山後，月亮升起來，剛開始只看到月亮的額頭，每天漸漸地大，也越來越亮，照著整個大地。農曆十五日當天晚上，月亮的臉又圓又大，很漂亮！有個傳說是月亮裡面有個美麗的姑娘在跳舞呢！

晚上時天空還有星星，我小時候住在部落時，會在庭院鋪上藤蓆，兄弟姊妹仰躺比賽數天上的星星，看誰數的最多。星星一下下閃亮，一下下又熄滅，我們總搶著說是自己的，庭院充滿歡笑聲。

天空應該還有其他的東西，只是也許離我們太遠了，我們肉眼看不到罷了！