朗聲四起

benabati dra saya dra batibatiyan i mulri na babayan. kemadri i mulri na babayan aw, asuwa driya. ulraya a marekataguwin. salaw raemetr kikarun. miwalrak dra misasa dra babayan aw dra misasa dra mainayan. ulraya a saya wari. muka i uma kikaruna na marekataguwin. aw kadru i ruma nadru na maluwadi.

a masiyakasik muka i uma nadru na marekataguwin i, maagelr aw abalu penadang dratu aekanan kantu walrak. paelipas lra dra karealriyan. nadru na maluwadi temungutungul mengarangara kantu maidraidrangan dratu uwarumaan. sabelaw aw matengadraw i baybay mengangara. “daw adri lra muwaruma i ama aw i ina?” kema.

piyaisatr menau i, ulraya a malulu a belrbelr kana lralrasiyan i saninin. muisatr tu wadi na mainayan. kadru kana lralrasiyan i isatr mekan kana belrbelr. i baetaw na babayan i, kadru i makadare mengangara. “pudareu a samaya a belrbelr!” kema emuiuy kantu wadi na mainayan. adri mikiar tu wadi. tu aiselaw kan baetaw na babayan i, adri muwai pudare kana belrbelr. kemay kana turak temawar muisatr i baetaw na babayan. meredek kana lralrasiyan i, tu ebutraw na malulu na belrbelr peniya kantu wadri na mainayan. “makuda yu dra alengatran! pakapiya yu kandru na belrbelr?” kema baetaw na babayan. aw masaseredr nadru na miyadruwa. matrina tu lrengaw aw kabekas druwa menauwa a tureanan. menau dra miikur tu tedrek, migumulr tu dradrek, midraradrarang tu trangar a druwaya a garamgaman i sausaub. magerareger aw karabureburek a trau. 

muruma na marekataguwin i, adri menau kantu walrak. tu tralrebtrebanan i, emauauaw dratu ngalad kantu walrak. kemay i dawilr kilrengaw dra “ngu” kema. amawna, adri menau dra mamanamanay i sabak. mauaw driya masalr. marisan temubang dra “ngu” “ngu” kema. mupatraran muka mayaa i, menau dra druwaya a lutung i sausaub. maulid dra muka dra manay aw mutulutrng tu walrak. salaw kuwatis tu wangnger kanadru na manay aw mutulutung tu walrak. salaw kuwatis tu wanger kanadru na temuwamuwan dra lutung nadru na maluwadi kema.   

marengay driya i mulri na babayan. an maluwadiyadi ta i, marekasagasagar ta, mapulrapulrang ta aw matukutukudr ta. adri inaba an madrikudrikul a sarumaenan! alra amau na kemadru aw mulelep dra kuwatisan maku! ta?!

從前有對夫妻育有一男一女。有天去田裡工作，兩個姊弟留在家裡，卻忘了給孩子準備食物，兩姊弟看到棚架旁有成熟的香蕉，弟弟爬上棚架吃香蕉，不願意丟給姊姊吃，姊姊爬上去卻發現弟弟自私的把香蕉都摘走，姊弟吵到鄰居，鄰居竟看到臀部有尾巴、有毛、臉紅紅的動物在屋頂，夫妻從田裡回來，不知道孩子為什麼會變成猴子，據說姊弟是猴子的祖先呢！

祖母說：「兄弟姊妹要友愛，一家人不可以打鬧。」也許是因為這個原因而遭遇厄運吧！