朗聲四起

siqunun cu’ timu ru mami’ ku’ tinmamian na’ Itaal cu’ cunga’.

maqiyanux cku’ ragragiyax ku’ Itaal cu’ cunga’. marinuwang ’i’ kariariax ru ara’ruwa’ ukas cku’ hihihi’ ku’ timu’. ayhung ’i’ magal cubalay cu’ timu cku’ ragragiyax. kahi kiya ku’ manamananaq ’i’ sumli’ cu’ nananiqun ku’ Itaal. lalingaylingay cu’ cunga’ ga, ukas ku’ balaiq ka sumli cu’ nananiqun uwiy. kahi kiya la ku’ siqunun cu’ timu ru mami’ ka nananiqun. sikabalaiq ’i’ maniq ku’ sibabu na’ naniqun ka hani. yani luhingun na’’ Itaal cu’ sawni ku’ tmami’ cu’ timamian la.

ukas ku’ sasukuun cu’ naniqun cu’ cunga’. kahi payux ku’ kumayhu cu’ kug ru sumli’ cu’ tmami’ na’ naniqun i’ kiya. tayhuk cku’ kaal cu’ sawni la ru kiya la ku’ giqas ka sasukuun cu’ naniqun. sukuun cku’ iqung ini ga imuwaag na’ buwinah. si’imag cku’ hi’ ka matiluq, mami’, turakis ru timu. asiki matiluq hayhay ku’ mami’ ru turakis naki ini pasipaqpaq ku’ tinmamian. si’imag cu’ timu ku’ siyam ru qulih. lawaun cu’ qutux cu’ gabiyan. aphan na’ batunux ru tayhuk kincasan la ga, balaiq tmami la. ma’naaring ’i’ tmami ga, asiki paglugani cku’ matiluq ka siyam ku’ timu. sukuun han cu’ siyam cku’ capaang na’ ik na’ sasukuun ru pakasiyaan cu’ timu’ la. muwanimuwani ’i’ mababuwinahbuwinah kabalay ru tayhuk cku’ riyatux na’ sasukuun cu’ naniqun la ga, samagan na’ abag na’ lamiquw. aphan na’ batunux ru nababalaiq ’i’ umumuk. yani naqarun la ku’ tmami la.

payux ku’ tiniriq ini ga ma’usa’ ’i’ tumay. Ini ga alun ku’ tinmamian ru yugun cku’ paptuwawun. kahabag ka wawwaw ka hani ga yani ’i’ balaiq ’i’ tmami’ cu’ tinmamian. balaiq ku’ qariyat ga payux ku’ tiniriq. muwani la ga balaiq qasugun cku’ qutux cu’ naniqan ku’ tinmamian. kiya ku’ ini qasugi ka tiniriq ga si’agal ’i’ tmami’ cu’ tinmamian. kiya ku’ waw na’ tumay ga mararag ’i’ mangagu’ kahabag ku’ qutux cu’ naniqan. mnama’ ’i’ tmami cu’ tiniriq.

payux ku’ summawwaw ka waw ga, balaiq si’agal cu’ tinmamian ru iwalna’ pintagsayhu na’ papatawwaw. asin ku’ waw ka hani ga, masibux san nku’ Matu’uwal. yani san na’ Itaal kahabag maha’, gaga na’ tinmamian.

醃肉是泰雅族傳統用鹽和飯醃製而成的製品。早期沒有妥善方式儲藏，就用鹽和飯醃製成酸鹹的食物，有助於增進食慾，醃肉便流傳下來。以生肉混合鹽巴和白米飯或是小米，白米或小米煮半熟，將生肉或魚類用鹽巴醃上一晚，用石頭壓緊至第二天。一層材料一層肉。最上層將肉類以醃製材料舖上，再用芒草葉鋪蓋，用石頭壓在上方，封緊容器，醃製工作才算完成。

在獵物豐收、準備迎親，或想當工資換取農務才會醃肉。這就是醃肉文化。