朗聲四起

Maaq mita bunun a indangi’an miqumis a, ininca’an Tainangta tu dalaq, ananqa tupaun tu Tainang, maupa’i maaq at bunun i dangqac qulbu ka pabaliv i sapa’ i qanvang. Tupaka dangqac qulbu tu, kuacuna’ amin cia ta’ina’ a sapa, antalam a bunun tupa tu, maupa’i maca minqulau ka mintumbuq a maduq a, maaq at pantau’ an qanvang a kangabul, anangqa tungqabin a pantau’an icaan kula’an, niitu asa ma’un i kangabul caan ismut. Tis’uni ki qalinga dii ka, maaq at dangqac qulbu ka, kadadauk tupa tu ta’ina ta’ i na, dungzavin tupa tu tainag taingan. Anangqa maaq at qalinga tupa’un tu tainang dii ka, imita’ aipi bunun tu qalinga.

Maaq at dangqac qulbu ka, tupaun dau tu Hulanza, macial i tataqu dau tu, asa macial malkacia bunun i haiza diqanin sasaduu, masnava i bunun mapatas tusauc, taqu dau pinzahum i sapa min’uni ki quhal pinukun, masnava amin kukuza macucuaz i kakaunun.

Maaq tu minsuma’in a Tesingku tupa’un tu puut mainacaan sipal ning’av a, panaca’ an dangi’an i bunun tu dalaq, musuu pakacia ki dangqac qulbu’ pasampanaq, pinvai’un a dangqac qulbu, tupa’un tu(hulanza) a mudan cuqis munha’an dalaq nai. Haiza amin tas’a dalaq icaan sila ki ning’avav, tupa’un tu Qamping, takdada’an i bunun mavavalu ki iskaan, maaq at bunun miqumis a, ininca’an amin sila ki ning’av, ananqa cia bunun i dangqac qulbu ka pinsuma’i qalinga tupa’un tu ta’ina, tupa’unin laupaku tu Tainag.

Tis’uni maaq at maisnacaan sipal ning’av tu Puuta, haiza naingka bucul pakacia ki dangqac qulbu pasampadaq a, lavai’an a dangqac qulbu, ananqa mudaan a dangqac qulbu mucuqis caan dangi an nai tu dalaq, maci’hal a dangqac qulbu i taqu tu haiza a diqanin saduduu ita, ananqa maaq at madadaingaz a maduu tupa tu nii tu matmang i bunun i nasadu’an diqanin, nanii a sin’iqumis macihal. Maina’iti a bunun masuqbung palcicia ki samu, kuciati maqaqasam i maikikingna pakacial amin a bunun miqumis, pakadaidaz, paindadangaz kukuza, tis’uni i napalatpu’ un nii tu tan’a. Musbai ata bunun, maaq tu mudaan bunun icaan Tainang a, panaca’anan laqdut tu dalaq, makiqna mudaan saupa Lamungan, mulusqu caan Siusiu masaupa Mihavaz dii, maupa’i madia a kanaangi Puutun a, muqna mudaan munca’an Asangdaingaz, makuacuna tupaun tu Mihavaz, maupa’i’ uklumun ata ki Puuttun a, makumaqmut ata muhavaz musbai mudaan masaupa ludun daingaz, uninnang miqumicang.

布農族的生命根源是在目前的臺南。早期跟布農族有接觸、貿易往來的是紅頭髮的荷蘭人。祖先叫他們為dangqac qulbu。布農族第一次接觸的不同類的人，第一次發現紅頭髮的人，才有這個詞。鄭成功來把荷蘭人趕走，又把布農族人也趕離，我們經過嘉義、雲林、彰化、南投，從lamungan到mihavaz之地。沒多久又再次離開，前往中央山脈生活、孕育生命。