Maca Taivang ti’ qabas a, nanu’ dangi’as ngaan tupa’un tu acing is talikuan. Maca talikuani’ nanu’ a nai malancas lukic cina mumuut maca kapupuaqin, na mintasalin a nai amin kusbabai. Altupat i’ica haan dalaq Taivang ti’, maltutuuc nai saduu’an kusbabai, mantan manau’az sala saduu’an ca talikuan mangki’ maca kusbabain. Mantan madia’ sala ca vaivivaivi ka talikuan ha’an Taivang ti’. Na maiza munha’an paat saba mutda’ ta’ ca talikuan ha’an Taivang ti’. Alminanan ca ta’ata’a ka talikuan mangki’dangi’as macial sala tan’aun a mastauluu tu ngaan.

Maca acang is Bunun Takitudu ki’, maupas Ququaz ciin Buqaiz, mantan madia’ sala ca talikuan, daqat maiza ca patungaanun nai ka talikuan. Uutu nii’ tu mu’amin patungaanan ca cikaupa ka talikuani’. Maca mataqdung a talikuani’, maiza kang kini’ maipipia ta’, mavavaivi ca matataqdung mangki’ amin. Maiza ca mamasqa’, maiza ca takikiuc. Nii’ tu maszang amin ca tasan nai. Uutu mu’aminang kini’ tupa’un tu “ taqdung”. Maiza ca maupas muut ca kisanglavan, maidusa’ang kini’. Tupa’un ca ta’a tu “tacu’,” Maca ta’a ha dangi’as visvis a’, tupa’un tu “ dusa’visvis”. Maca tupa’us Bunun tu “vasang”, maiza maidusa’ang kini’. Mapusqaiv ca tasan is ta’a, ua’ maqaihac ca tasan is ta’a. Maiza ca mabulav tasan a talikuan, Mataqdung ca kauskaus is cia, tupa’un tu “dusa’tikic” ca ngaan cia. Maiza amin ca tupa’un tu “tamana’ciin bulav”, Maca maiza ca tasan cia maqatumu maupas mata’a’ a, na tupa’un ca ngaan cia tu “ mata’“.

Maiza amin malasmaduqac a talikuan, haiza paat ca visvis cia, daqat tupa’un tu “paatvisvis” ca ngaan cia. Maiza amin ca talikuani’, maca panduu ha, nii’ tu pantipul ca pani’ icia, nii’ liliva’ tu maupas makulapha’. Daqat tupa’us Bunun tu “ kulapha’.“ Maiza amin ca malasmabulav mamasqa’ sala ka talikuan, tupa’un “ muung” ca ngaan icia. Maiza ca niit liliva’is lisav a talikuan, tupa’us Bunun ca ngaan cia tu “ lisav”. Maca madangqac ca manququ’ is pani’ a talikuan, maiza maidusa’ang kini’. Tupa’un ca ngaan is masqa’ a’ tu “ taikimpi’. Maca ngaan is  takiuc a’ a, tupa’un tu “kukimpi’.” Maiza ca talikuan titi’ti’ saduu’an maca kusbabai, daqat patingaanas Bunun tu “ titi’ti’”. Maiza amin ca maququin cina mapupusqu’ sala ka’ talikuan, tupa’us Bunun ca talikuan mangki’ tu “ siza’is’ang”

台灣有蝴蝶王國的聲譽，它們隨著大地上草樹之花朵的盛開而漫天飛舞，在大地遍野上無所不在，那是多麼迷人的影像啊！台灣蝴蝶種類相當的多，計有四百多種蝴蝶，每一種蝴蝶都有它們可愛的名字。

卓群布農族人的部落，如曲冰、武界，因為蝴蝶相當多，所以族人也為蝴蝶有所命名，但是沒有為全部的蝴蝶留下美麗的名字。