朗聲四起

Maca tasan mangki’ a naut talmamaupa kang kini’ tu mama’az, ica’an ngalan ngalan is takdangi’anta miqumic a aidalaqan ti’. Maupas itu diqanin a mama’az, itu aidalaqan a mama’az, itu ning’av a mama’az, itu bukzavan a mama’az, ukmuzas vaivivaivi ka tasan. Makaca’an sinaduu’as mata’ nita’ tu kaiqancaipan macqal is vaivivaivi ka tasan mangki’. Ua’ patungaanunta ka nai tu tukau’un ca tasan cia. Daqat maca saduutas vaivivaivi tasan is aidalaqan dii ha, na musuu’ta min’anak maqanciap tu mama’azang kini’. Altupat makua tu ma’maz a na pacqalan tu makua ca tasan cia.

Maca ngaan is tasan mangki’ malasbunun a, nii’ tu dang pia ta’, na pakacanunta sinbazbaz is madadaingaz nita’, pisqanciap tu mama’az ca ngaan is tasan mangki’. Na maiza cikaupas sinpalaqanciap ha’an nastu’ mangki’. Maca maupas qulbu bununi’ a mataqdung tu tasan. Amin ca kadungi’, tupa’un amin tu mataqdung. Maca katapunung is ludun a paav, tupa’un ca tasan cia tu maduqlac, madauqlac amin ca luhumi’. Maca tiquc is bununi’ a tupa’un tu madangqac, madangqac amin ca laac is mumulac. Maca minkazhavin ca diqanin na minbulav ca lisav is lukiclukic. Amin maca macacakin ca bunbun a, na minmabulav ca tasan cia.

Maizang amin ca duma’ a tasan sinpatungaan is Bunun, uutu nii’ang nanu’ maszang ca sinpatungaan mangki’, na mucqa’ mavaivi tukuc ca sinpatungaan is tata’a ka acang. Maupas lisav is lukic cina mutmuut mangkun, tupa’un ca tasan cia tu masanglav. Uutu, maca tasan is diqanini’ a tupa’un amin tu masanglav. Maca masqa’ ca ning’av a, na masanglav amin ca tasan cia. Maca maupas qanvangmuut, cakut, qanvangpusqaiv, na tupa’un ca tasan cia tu mapusqaiv. Amin ca tasan is qamutic tupa’un tu mapusqaiv amin. Daqat maca tasan mapusqaiv dii ha, nii’ tu maita’a ca tasan cia saduu’an. Uutu mu’aminang kini’ tupa’un tu mapusqaiv. Maca tasan puaq is qalup tupa’un tu macinhav. Maca tasan laac is kuncikmun tupa’un tu maqaihac. Maca panmangmangin ca daqais pastung cina panludaqa’ a , naut tu na matuqaihav ca daqais. Maca tasan is matuqaihav a daqais dii ha tupa’un tu maqaihav.

顏色是自然現象，生活角落都充滿著各種顏色，透過眼睛感知的經驗，我們就自然就能夠分辦是什麼顏色了。

布農族人顏色的名稱不多，就如頭髮、污垢是黑是黑的。雪、雲是白的。血、野草莓紅色的，樹葉變黃色、成熟的香蕉也是黃色的。布農族人視樹葉的顏色是綠色。青空、大海是藍色，棕褐色的水鹿、山羌、和灰色的水牛、老鼠是視同棕、褐、灰的顏色。桃花的顏色叫粉紅，椹果是紫色。臉部碰撞瘀青，這個顏色就叫黑青（黑布）。