朗聲四起

Maca madadaingaz inita Bunun qabasa mu’amin takaha’an libus miqumic, maupa’i iha’an libus miqumic anaqat uka’ is duma a tatancala, pakadaqvis sala ca lumaq dangi’as bunun qabas, anaqat nitu maqtu buntu patantutungu pasaduu; tudiip maca mucqa maiza ca masauqbung a sinkuzakuza hana tudipin munha’anang ica tu lumaq tantungu, ut’i maca makaica ha namucqa pasaduu han daan, nitu maupas minlalaupata tu mal’inuun ca bunun iha’an ta’a ka acang miqumic, maqtu qailic buntu patantutungu.

Maca mucqa pasaduus duma bunun han daan a, qailic ata macingav tu: mun’ica kas? nitu tupatu asat maqanciap tu ma’az ca sinkuzakuzas bunun, mu’haz ca is’ang inita asa pababazbaz maca pasaduu, maqtuqa mu’haz laqai maca pasaduus duma bunun﹖nitu macial ca maupata. Kuniqangka qalua it mulung maca palusqaqtung hana?

Minuc’anang, tu’aniva nam is pantamau ku munha’an diip tantungu, maupa’i na siza’us bunun ca uva’aznau’az icia, anaqat mu’amin nam tatlumaq munha’an diip tantungu. manahip sala azam muskun ma’un muskun ququu is davuc, maupa’i sausanava nam ha’an ta pisnanahip mibusukin tukuc,anaqat nii azam ucuqaisan mulumaq’i. masulavi azam iha’an lumaq is pantamau masabaq.

Maca qabas padaqvis ca lumaq i bunun uka’ is laihlih maqtu daza’an, anaqat nitu qanglac patantungu, laupinta ca bunun muskun ha’an tastu acang miqumic, haizin amin ca laihlih daza’an. Misna ca’anti ata saduu tu nitu maszang ca iniqumicas madadaingaz qabas ciin iniqumican nita haip.Utu asat nitu minpungul tu maca ha’an daan pasadu asatu muluu’ pababaznaz.

以前在路上與人相遇時，我們一定會說「妳們要去哪裡？」只是禮貌性而已。有一次，我的叔叔邀請我去參加婚宴，因為他的女兒結婚，殺豬分肉，我們吃吃喝喝，喝得醉醺醺的。喝到很晚了，我們就在那裏過夜，結果睡到天亮了，早餐吃過後我們就帶著所分配的豬肉回家。在路上遇見人，就跟他打招呼，也分一些肉給他們，他們拿到後非常高興就離開了，我們也很高興，因為我們有按照老人家所教導的去做了。以前的生活跟現在的生活很不一樣。