朗聲四起

a kulabaw salaw mingalad kana drekall i Puyuma. an uniyan dra bangabangan i uma, an kasedean dratu kiyakarunan, maalialiw dratu alialian muka penetrira dra kulabaw. an kadru a kasangalan tu sabak tu nirumaenan, muka penetrira dra kulabaw pakasemangal dra nirumaenan. an mangayaw na drekall, marasadrusadru tu rawa na kulabaw. an kadru a miwallak tu trau i sabak, adriadri dar muka penetrira dra kulabaw semakisiw dra nirumaenan.

a kulabaw i, marekamenimeni tu pinungaladan.

1.na pukaisa i, amau na kakulabawan. na maekan dra asepan, dra lumay, dra bunga, tu rami kana rabutr kana bariyaw. na dadawanan i, kamawan dra kunin tu ikatratrina. tu kinasagaran penetrir dra trau.

2.na pukadruwa i, amau na rabutrubutruan. adri dadawanan i, matrina tu butru. an mupetrir i, tu alakaw dar.

3.na pukatelu i, amau na garasegas. makarumaruma, makalayalayas i sabak pagarasegas. driyama pungaladay dra garasegas. aw pinungalad driya dra madradruwayan. ngutengutay na pinawti na lumay. aw ngutengutay na kiruwan na trarub. an mutiyu kana petrir tu atellanay. adri maekan a trau.

4.na pukaapat i, amau na kamutis. miludus tu nguwarengur aw angesis. a baliyangsus kema. adri maekan a trau.

5.na pukalluwatr i, amau na buniyuniyun. makeser emungeung dra dare. makasabasabak aw mellalleet dratu rami dra sinaleman.

an mirawa kana kakulabawan aw kana rabutruan i, tu labelabaw driya tu gumull, tu truwakay, tu trapayaw lla. tu niyababak i, tu pusiyaway. a parimawan kema. uriyay dra gamusur dra tatukem tu siyaw i, salaw arellet. na trinapayan i, tu kasuwaw muruma. an temuirupan i, na niringring tu uriyay dra kamangull. na sinakisiw tu uriyay dra tralun. salaw imaran aw pakainaba dra dradrek.

na llallak garem, tu pakusenayanay na kulabaw. “nantu tranguru kana kulabaw i, tu mayku kana yawan. tu ikur kana kulabaw i, tu sallekudran kana mumuan. tu trinai kana kulabaw i, tu drana kana bulabulayan. tu butru kana kulabaw, tu singsingan kana bangangesaran. tu lubitr kana kulabaw i, tu llungpaw kana maaidrangan.” kema. salaw kasagasagar an semenay.

鼠有很多種類，名字各不相同。田鼠，喜歡吃農作物，是捕獵者最喜歡獵到的鼠。第二種鼠體型較小。第三種鼠喜歡沿著牆角，一隻跟著一隻，喜歡啃咬稻穀的網袋、衣服和被子，這種鼠沒有人會吃。第四種鼠鼻子尖尖的，很臭，沒有人食用。第五種鼠會翻攪泥土，還會咬斷農作物的根。

如果獵捕到第一種和第二種田鼠，會先燒除鼠毛，再宰殺乾淨，然後燻烤至乾。和紫背草或是龍葵一起煮湯，湯鮮美味。