朗聲四起

a Puyuma i, salaw padrangal dra kiyagelayan. kinamakitengan tu paladamaw dratu maidraidrangan dra kiyagelayan. tu pakallanganay dra batibatiyan, dra kakuwayanan, dra llegiyan, dra kasangalan i drekall temakesi dra kiyagelayan. na mainayan lla aw na babayan lla i, marisan temakesi dra kiyagelayan.

na mainayan i, tu pakallanganay i trakuban aw i palakuwan temakesi dra kiyagelayan. na trakubakuban i, kakuda na maranakan. kakuda na maradawan. na maranakan i, kipatakesi kana maradawan dra kiyagelayan dra maramaidrang. na maradawan i, mabangabang dra kuwadakudayan paladam kana maranakan. an kadru mulitrung dra apuy a maidrangan. an menau dra arutamamaku i, payas bellekasan na maradawan malak dra apuy padepe kantu tamaku kana maidrang. i nguwanguwayana ku kema. an numa i, driyamamayaw dar tu suruway dra apuy a maidrang. kemadru panaunau kana maranakan dra kiyarungetran, dra kiyagelayan dra maidrangan.

na miyabetan i, pakasa dra igela dra drinekallanan. an kiretrebung dra maidrang dra mibinasak i, tu alakay benasak. tu atedranay kantu aukayan. salaw temaranapaw dra kiyallimusan. pallu dra maidrang marekigelagela dra maramaidrang kantaw. salaw bulay tu kakuwayanan na padrangalan dra kiyagelayan.

na babayan i, adri kamawan kana mainayan dra ullaya tu trakuban, tu palakuwan tu wakasayan maradruk marepaladaladam. asuwa driyan a babayan i, kuredikes dra kiyakarunan dra dawa, dra bini dra kiyarungetran i sabak. tu paladamaw tu llallak dra kiyagelayan. “an matengadraw ta a babayan i, ta sepedraw ta llabit, ta dapall. adri ta matatengis dra akanan i dalan. ta lubisaw ta maidraidrangan, ta nirumaenan. ta kainabayaw a trau i, tu kainabayaw ta dra trau...” kema temuru paladam dratu llallakan a tainainayan.

an muketrep tu ami dra babayan i, tu paladamaw dra laleutran. kiramiyaw pakurenang dra miyasaur. mellatudr dra dawa i, tu takesian dra babayan. kurenang dra kadruwadruwanan aw temakesi dra kiyagelayan dra maramaidrang aw dra maaidrangan. pallu dra maidrang temakesi dra kakuwayanan dra kiyagelayan a babayan. idri tu kakuwayanan na bulay i, amau tu laladaman tu takakesian dra llallakan garem.

普悠瑪的人自小就被長輩教導要注重禮節。從傳統習俗文化、祭儀來學習禮節。不過，男與女有些不同的學習過程。男的會經歷少年會所與成人集會所的訓練。

少年組接受青少年組學長制的禮節訓練，而青少年組則著重在如何教育少年組。至於準青年，很注重對族人及長者的禮節。以前女子要擔負小米田的工作及家事管理。十歲開始學習刺繡，參與除草團工作。小米田是女子學習的場域。從團隊生活中向長輩學習禮儀。