朗聲四起

ona’i ’aamadhalae, dhona’i dhidhapenai ’Oponoho omoanai ooma lronge’e. mani poanai vecenge, tai, pahai, mairange, lelepe la taramonahe, tavolrolo, karidhange, lredhekenai.

lo ceve’engadha lo maalolohongadha, mani pomadhonga mani alranai ’italeke. dhona’i ’a kasadha dhona’i akanaenai. lo moamao ooma mani kasi’i acilai aamecaemao, lo ikidha ’i mairange, tai, taramonahe, aa’o, opoamao icivi. odholrokanai ka tokaahaaha’ae dhona’i aamecaemao acilai mani alra poamao to’asolro’ae lo ikimao ’i ooma. lo ikimao ’i valrio, mani poamao ’i aa’o ringiringi. lo ikidha ’i alopae, ka’ange, mani poamao okame alakai lo pi’amao aana’i ’a ’anoalreme lo konemao mataadhi’i.

niikaodhoadhiname timo, ka opoakanai ka potimo. opi’anganai dhona kipotimo kone. la ka polringaokanai, to’inilraonganai. oha’anai mairange, tai tokakanekanaenai. ’ina’i valravalrae omi’a kanekanenai katalrisie maramaramao.

lo maerekenganai ’i va’oro, mairange kone, opoanai coloko vecenge, pahai. mani dhaace ’i a’olalai moa lroikiikisi mani poamao palripoco kone.

lo olopodha a’olalai mani poamao tolivee’ao vecenge, pahai, omece ’iadhodholro’o. lo ’asika’olomao, olo movalravalraemao, poamao coloko ’i pahai mani poamao topa’ange ’i vecenge palripocomao ’i votolo mani amecemao. lo movalravalraemao lo ’ataoaoanaemao, lo maa’amao oamecemao dhona.

olo kaladhodha’olae lo ivalrivalriomao, kioamao ooma, mani alra ’i tai, ’i cipi topa’alraemao pakapacai mani poamao tokotoko toovongo. mani poamao acilai cicio li’olro poamao topelrepelre mani poamao potacolokae. lo madho’ongadha mani alramao dhokoi opii’amao palripoco ka’ange, lelepe, palripocomao. mani kanemao mataadhi’i. ma’inomao omece movalravalrae dhona. idhopelemao dha’ananae kone.

aikinai kavalriae, ’inikakamamainai lronge’e, poanai polravo vecenge, mani alia’anai pahai, lredheke mairange, tai, mani aliali’a lelepe, karidhange, makatamalie, ’inikakamamai kone. mani laponai ove’eke, ’inicacolonai, to’adhamadhamai. olo dhomanae, mani dhapelenai toka’aka’ange lroikiikisi mani alra o’i ka’ange to’adhamadhamai. mani alopo a’olalai, malra o’i alopae to’adhamadhamai. dhona ka olangaikanai ka to’onai, okaodhiname paiso.

介紹舊萬山的飲食種類及烹調方式；以及不同場合有相對應的傳統食物。