朗聲四起

Habasang mailantangu Bunun hai, matusuhcis mas Samu tu islulusan. Mailantangu maimadadaingaz hai mapising mais tupa tu anhailu mas samu Masa niang liska uni Kamisama Bunun hai, liska sian amin mas Samutan. Aupa maza samu hai maszang mas itu bunu tu kanadan tu hulicu. Tupa madadaingaz tu masamu, ansais mas saitangus sadu mas vali. Aupa maza maikikingna hai nanii tu tauhumisan mas dihanin. Auphasia asa tu samashing mas madadaingaz masitutuhas, aupa naia hai saitangus sadu mas vali. Bunun hai liskadihanin, masamu kuzakuza makuang tu iskuzakuza.

Aupa aiza idadaza dihanin malsisivit imita tu sinbizakbizak. Masamu dau mapat’nu mas hanivalval, aupa nacinkavunga ima. Masamu sakulaz minkulaz tu bunu aupa na ulan mas dulus. Masamu tuhasaz bunun, aupa na u’anakan mas sintuhasaz. Masam silili mapiaha tu bunun mudadan na ulan maupacia tu dulus. Masamu sipazipik natankunulan. Masamu tanghaiu na umpauknuan. Masamu matas’i mapinkuang duma tu bunun aupa natai’anakun. Masamu mat’nipah bunun ,na tangkitalan, at, naminciahav mata. Mais namudadan hanup hai masamu hasbingan anis matunus. Masamu tanghaiu maun iut bunun tu nakaunun natalbihaian .Mais iskasia dan sadu mas hazam hai, masamu aivilian kusbai. Asa tu musuhis kulumah, islunghu mastatala manaingal mas taisah.

Masamu maluspingaz anuni mas i tu mabananaz tu busul, haimangsut. Masamu mapalamasamu mapadangi, nakidazun tastulumah. Masamu ta aza tucicini tu’i’ia tu hazam, namintainalu uncinian. Masamu uvaz maun mas pani tu tulkuk, Aupa nacinhaulili mais sungkat. Masamu maun mas bantas tu tulkuk, namuhaisusut dun mais cindun. Uvaz hai masam maun cicitu maituhu nacinhalput a tuhu. Tupa madadaingaz tu masamu anhailu mas samu cin maza samuan hal, maszang mas imita laupaku tu ishahasam tu hulicu cin.

Masamu ikmuhmuh, mais niang linusanan tu nakaunun haising. Masamu ikngaus maun bahlu tu cilas mais niang linusanan andaza. Masamu haising ibulan maivanu tu vus maun ,aupa na un’sauhzangan. Masamu tumuhmuh, masamu isia madadaingaz tu tanangaus matunus. Kaupa mas isam’aminan mahtu matasi bunun, haitu nitu mahtu kamazavmaza matas’i. Amin bunun hai mapising mas isam’aminan. Tupa madadaingaztu, asa tu kapimaupa matusuhcis mas samu tan at. Namalisvala mihumis nastucin.

過去的布農族人非常謹守禁忌，未信主之前布農族人都是以禁忌為規範，因此禁忌就像是布農族人的法律。

因此過去族人說禁止違反禁忌，就像現代要遵守法律是一樣的，還沒有進倉祭的新米不能先吃；蜂蜜跟飯不可以配著吃；不可在長輩面前說不雅的話或是放屁；只有巫師能對人下咒語，但巫師也不會隨便對人下咒。老人家說要謹守這些禁忌規範，這樣才能安穩的過生活。