朗聲四起

kahiwan tu thau a azazak ya makthiniza wa qamishan, mashtay ya itia sa Pariqaz a thau aparuan sa nipin, zain Shpuut mzai “kung-kak-khi”, aparuan thithu dai, maqa izai a nipin antu maqitan, ya paruan kmaruruan antu akindal mita wa tanatuqash. numa tu kahiwan izai azazak ya langqisusayuan, paruan sa nipin ya itia sa Pariqaz a thau. paruan izai a nipin maqa antu dai akindal sa mita wa tanatuqash.

numa tu iaku itiawan naak a ina mani, miazithu mani pinaruan nipin, zaik naak a ina mzai “minu mihu a nipin qa amiazithu?” ina mzai “maqa tu azazakuan paruan sa nipin, pinaruan sa nipin, numawan uka sa tusha wa nipin, maqa ya kmaruruan, ya pinaruan, antu akindal sa tanatuqash.” numa iaku mafazaq mzai Thau a kazakazash, mzai ya pinaruan sa nipin antu dai akindal sa tanatuqash. antu mzai lamaqitan ya kmaruruan sa nipin, mzai antu akindal sa tanatuqash, miazithu izai kahiwan Thau a tanatuqash a lalawa.

numa tu itiza anshaishiniza, itiza Lit-puun munai lhungqizi, numa
Lit-puun minshiraq mzai “ataiza! ata tu karuru’ii sa nipin! maqarman ya kmaruruan.” maqa isisuaiza tu pangqaiza, niza tu paruan sa nipin. muqayza thuini pintataiwar kmaruru sa paruparu a thau, muqayza pintataiwar, niza tu sunda kmaruruan sa nipin.

kahiwan dadu kmaruruan sa nipin, muqayza thuini pintataiwar kmaruru. maqa tu kahiwan itia Lit-puun lhungqizi mzai ata tu kmaruru dai, amaqarman riqazan ya miazithu, numawan thuini niza tu kmaruruan sa nipin.

thuini a paru nipin a kazakazash antu sunda paru sa azazak a nipin, muqay pintataiwar pinaruiza sa nipin. thuini ya Lus’an ya itia sa Pariqaz, mara’in a Lus’an, isa makashpat furaz turu a qali a shashanu, aparunipin a azazak miasuun isa Lhkahihian a daduu a taun. paruparu a thau Lhkahihian numa Lhkatanamarutaw a daduu. mara thaithuy sa paruparu numa pasiz pintataiwar paru sa azazak a nipin.

 

以前有為小孩鑿牙的儀式，被鑿掉的牙齒，稱為「角齒（犬齒）」，因為邵族認為角齒不吉利，會剋到家中的長輩。日本人說打掉牙齒很不好，要求我們不可以再打掉牙齒，後來只剩下假裝打牙的動作。

現今邵族新年Lus’an時若是有人擔任Pariqaz，那麼這個過年就是大過年，在八月初三這天的早上，要鑿牙的小孩子就要集合到陳姓頭人的家裡去。負責鑿牙的人是陳姓和高姓氏族的頭人，他們拿著槌子和鑿子假裝把孩子的牙齒敲打下來。