朗聲四起

lu papiyamada ki daane ki umu si kaingu, walribatemadu ku taikalra ku lregelrege si taikalra ka drakehale alakelanga.

ikay kaelrelrea taikalra ku adulruwanemadu ikai isadra, swahahe ku ilukumadu ka amece. kunai yakai ku watakainene ikay ki yababiyabila ki kaelrea ka lrenege, yakai ku watakainene ibelenge ki angatu, syavava idra tangimiyaiya ki lregelrege si taku kisupisupilri idra mangangengehece ka saseveha, kudra vangevanga upunga demedeme twapapalranga ki saseveha kaulrau.

lu ubaisinga kay bahangenai, ku ina la patwalai ki kahadrahe malra idra padulrungainii ka akanea, yakai ku nyakama ka buhasi, yakai ku tai, yakai ku cinabuwa, lu ikaimadu lregelrege kwane ku akanea pahamuhu ki alimema.

ku ina lapelaela naiya ku makaelaela ku nguakai ki lregelrege ka lalrisi, laiyaikai, lu asaa lu kelakelangata idra tatulrisilrisiya, icelreba kai kauhivahiva, lu pudrapalenumi palalrangemadu, lu ngukaiya ki thulida kadruwamadu ka apasihasihahe, la kaimadu dukudukulru sana amanema pauwa inya tatulrisilrisiya ka daedae, mababitingimadu lribate, ku tahudrawdrange amiyaikai, lu kaisu musakene ikay tatulrisilrisiya, mwacugumadu amiya.

lu aipadalrungamadu si kela ki cekele, lakialalramadu lu senasenai ku lalai, ngwaalraa ku sakiadudulrumadu, ku ina amiyaikai, kay lalai mailuku ku amuesadha si sakiahagai, sanakilalra ku walalai, maulrau ku paupava.

lu kelanga ki maungu pwatinakimadu, ku umu la akakame ku buhasi si butulu, padulrudulru ku kwaubunai, lu aiavaevaehemadu mwaki hetesa, siaulahemadu, lu udale la ahakaimadu ku balraku silenai.

sana ngulringavaku ku taikaiyaneli ki cekele lregelrege sa alruladhaku, ku tangilribataneli kivayvai kivayvai, ikay ki kidremedremeli amani ku taingeaa ka sangu lriyalringavaneli, aiapalralrautha ikay ki kidremedremeli kai kaulrawlrau.

到外公外婆的部落要經過好幾座山和溪流才會到達。休息時，我們坐在路邊的大石頭、樹上賞景。肚子餓了，媽媽拿出備好的食物，在山林裡吃特別好吃。媽媽講一些山裡的禁忌，說：「到禁地腳步放輕，不可以丟東西，要安靜的走過。」否則會被詛咒。帶來幸運和快樂的報喜鳥唱著歌，煩惱盡消。」晚上，點上油燈。外公烤地瓜和肉準備晚餐，想去親戚家串門子，要帶火把，若下雨就拿篩子遮雨。部落的生活在我心中是最美的回憶，永難忘懷。