朗聲四起

aucaucani ari taluamaciciana, rianʉ siasasangara angatʉ. siasasangara kana’ana, kupa takua’alivatana, ihlaisa muarahlua.

aariaari maivʉvʉrʉnga, uka’a ina’a pialʉmʉlʉmʉlʉmʉ makuvau, uka’acu mʉmʉa vahliungu pakiaturua, tamuucuaku pi pasamia matasa’ai taarʉ pausasaliri. kupitʉkʉtʉkʉa taramuarʉ pasaʉrʉkʉcʉ, kuuruahlʉ parucarucakʉ pakiaturua. takacicihli takʉmʉ’aʉ ia usiacu pakiaturuana. ihlaisa’ai hlicalivaku mʉlʉngʉsʉ siangusipa umiiapʉna, mataingalʉ mavacangʉkia ucani vʉrʉnganʉ, ihlaisa matalakiahlʉ tʉkʉtʉkʉa.

miungu kʉlʉpʉngʉ kumamahlipapu, tam macicia tahliariana, ma hlisahlikua sasaruanana rumahlaʉ. makihluhlu papiaini tukucu, kiʉlʉsʉ mahlukua patʉkʉ lakua pasaulaula’ʉ. marumiamu ramucu marakauru sahlumu, pukua tihla’ahlʉisa tukucu, kani’i parikakua naania vahliungu hlipacaca, kana’a vahliungu hlipacacana, ihlaisa mavacangʉ vahliungu hlipacaca ma kani’i sasaruana.

akuisa pasalʉpʉngʉ pasaulaula’ʉ rumahlaʉ, maruamu kalahlapa kiu’u tupuru, pasaʉlʉsʉ pi sipakakarikari pi sipacaca, tamuucu mavacangʉ pasamiaisa. umusahlʉ rumahlaʉ, patasuuru aramainia usahlʉ ia, kutarakakukua hliarucarucakʉa hlamama, mahlava saungana, maru matarʉngʉrʉngʉ uamiana musasala, maricataisa marimucucu mavacangʉ varatʉ. kiariari pasakʉrʉkʉrʉ musa umiiapʉ arakukacu mʉmʉa. maru maci aihla saungana, tumapara tararʉngʉrʉ tihla’ahlʉkia, mʉlʉmʉlʉmʉ pi mavacangʉ tacacuruna.

暑假的每一天都開心地不可言喻。每天早晨，沒有了媽媽急促的催叫聲，沒有了鬧鐘聲，我不用擔心遲到、老師的訓斥，醒來已經九點多了。中午，當太陽火辣辣地照耀著大地，約好朋友一起到水池嬉戲。嬉戲完後，便坐在松樹下面有說有笑。下雨時，帶上雨傘走在濕潤的小路，大口呼吸著新鮮的空氣，有時還將雨傘收起，感受著雨的滋潤。雨後，看著天邊那道神奇而美麗的彩虹。下午，夕陽斜照，溫柔而美麗，享受快樂而又幸福的暑假。