朗聲四起

ariatʉkʉranaku ia ihlaisa ucani mavacangʉ hla miahlivihlivia angahlahlana, ihlaisa mʉmʉa ucani mavacangʉ ucani pihlingi, ihlaku ia ihlaisa siacacihliisa kani’i pihlingina. karʉkʉhlʉ mʉcʉkʉhlʉ mahlukua ariatʉkʉrana, tumatimahlakia ucani tarʉana mariatakahlai pisiarina malitʉnʉlʉ pakiaturua tam mutuvavʉrʉnga, timahla ia tamuucu mahlahlatʉra.

mʉcʉkʉhlʉ miungu sipangʉhlʉva ariatʉkʉrana, taramasaihlaʉ kumakitakia aucaucani hliupucua tavahlihla rangacʉ matavuhliuna murumita marun ahliacuvungaku, tamuucu mutuapahlu samahlʉmahlʉngʉ. hliasasarʉ ’ahlivi sipangʉhlʉva ariatʉkʉranana, rianʉ vuici matavararʉ ’ahlivi, hlaka taiacu miaungua ahlakahlamara. ma ’ilikusu tavahlihla angacʉna, mariaititia hlarangirangi cukahlangʉta, maci miungu takuacaniaʉ aari apusiri hlarangirangi cukahlangʉ rumahlaʉ, kumakitakia ahlahlalua ahlahlaina kirahlʉmʉhlʉmʉ kirangangahlʉ mukakakua naani, musiri patakʉ mavacangʉ hlarangirangi cukahlangʉna, apailʉngʉsa hlarangirangi cukahlangʉna.

muhlusuhlusu mukakakua rʉrʉmʉna, ihlaisa hlitamahlʉmahlʉnga ariatʉkʉrana, ta’iaraisaka hlamunaʉ lumili apuruhlu, tam sihlangʉ tapaʉisa, pulʉpʉngʉ hlitamahlʉmahlʉngʉ ariatʉkʉranana rumahlaʉ, mukakakua uruamitana, miungucu pamavacangʉ tʉkʉ parana, parana mitahlahlʉ, naanina tamuucu maranarʉ, ucani takuangahla takʉlʉkʉlʉkʉ upatʉ hlimiungu tacʉpʉnga, maci miungu tarisia miatahlahlʉna, maru kani’i parana mitahlahlʉna tamuucu hliururahlʉnga laʉlaʉvʉ umaiiapʉ hla matumuhlu langʉlangʉ. maniki taisa maranarʉa parana mitahlahlʉ, pasahlusuhlusua hlakana’ana tapilʉpʉngʉ, mapapihli sialangahla tarʉana umiiapʉ. ma aisa parana mitahlahlʉna, ihlaisa sipiataʉhlʉkaina, taluvaʉlʉ umiiapʉna, naani ia mataingalʉ tumahlaʉa cucu’u pasaulaula’a, pamahlʉmahlʉngʉ atʉhlʉngʉ, naani pi vahliungu sipacaca laʉlaʉvʉ, marumʉmʉa laʉlaʉvʉ vahliungu mauvavaʉlʉ, kani’i mʉmʉa ia hlaka siangusipia laʉlaʉvʉ umaiiapʉna, ihlaisa mavacangʉ.

kuucaniia ariatʉkʉranakuna mavacangʉ, marumana matumuhlu mavacangʉ siangusipia, pi mavacangʉ siusuaturua liliunga, marumana takualangʉlangʉ pakiaturuana pulaʉvʉ ihlahlamu. marapihlia siangusipiku kani’i mavacangʉ liliungana, tamuucu pausakisakiri. marumukuaku mavacangʉ ariatʉkʉranakuna, taisa pihlingiku.

學校是豐富的知識海洋，更是快樂又溫馨的大家庭。走進學校大門，是紅色的牽牛花，兩側的爬山虎。升旗桿兩邊的榆樹既遮雨又遮陽，走進剛粉刷過的教學樓，耳朵灌滿了同學們的讀書聲！參觀完教學樓來到操場，中間有足球場，這些都代表著生活的豐富多彩！

我的校園不但景色美，還有豐富多彩的生活，有舒適的學習環境，更有老師培育著我們。我為我生活在這樣的大家庭而自豪，我愛我美麗的學校—我的大家庭！