朗聲四起

pasalʉpʉngʉa hliarupauahliana rumahlaʉ, apaumamainiacuaku.

ihlaku ia ucani rahlʉngʉ malangihlu, pi sapi malihlʉlʉhlʉ, ucaniika pi hlataula’a tʉkʉ. maraiahlʉaku lailaivikuna, mutuvavʉrʉnga, umaru sahlumu pahlamʉrana taraʉnʉ, hlisahlikua sihlangʉ, aariaari maru mavacangʉ siangusipina.

ʉrʉkʉhlʉ siakita arina, kiahlahlamu kisuahlahlama hlicaliva arina, miacacalivia pasamiana, aratataisaku, ucaniika kupautuahlangi mahlʉlʉpingicuaku. marucua tikiku takacicihli, pausu’uluaku kumita kani’i sasaruanana, mara mahlasʉngʉsʉngʉ, aariaari atʉhlʉngʉ takuliacʉ siangusipa. maramaisasukasʉcuaku, kuatʉatʉhlʉngʉ hlimarapihli hlamamaku, kuariatiria ruvanana marapihli ihlakua hlamamana takuliacʉ tʉkʉ. macahliaku sangʉlʉ tikiku takacicihli, angahlicuakuisana misau ahliakuana.

aariaariaku mitalʉvʉngʉ maru ’ilipina, micikiri sasaruana. tʉkʉtʉkʉa alalamurua, aramuamuarʉ taluavailicu. ma kana’a mavacangʉ hlicalivana, mara pahluailiacu. lailaiviku kucumʉmʉa pasaʉlʉsʉ ihlaku pasaulaula’ʉ, kuacahlia hlakana’ana ihlaku, kupi tʉkʉ mʉmʉa aracahlia ihlaku, aunanacuaku aramuamuarʉ misau. umahlikua kani’i sasaruanana tamuucu mahlasʉngʉsʉngʉ, mahlasʉngʉsʉngʉaku patasuuru, alʉhlʉvʉ ihlaku, hlatumuaku miacuhlu, pasamamanganʉ micuhlu. aramuamuaricuaku mara mahlisarʉ tapaʉisa, ulavaisa, uka’acua manganiku maritara’ʉhla usumanʉ. micuhlucuaku, mukuaku matahlʉkʉtʉkʉ sasaruana.

arumukakui aunanana, pahluaiiailicuaku. atʉhlingicuaku hlamamaku hla lailaiviku, mavacangʉ mavacangʉ kiariarina murumita ’ahliacuvungaku. kani’i palilʉmʉlʉmʉa varatʉ parikakua naani, aparivalihlacʉaku, masasangarʉaku kumita apitilihli tihla’ahlikuna. kumakitaku hlamamaku, mungahlʉaku paumahlʉmahlʉngʉ hlamamaku, pausu’uluaku hlamamana, kuacahlia kihlaumangʉiau parausauacua vʉkʉisa, ma hlicalivana mulavaʉ sapiisa hlamamana, takuliacʉa tikiku musa ʉmʉmʉcʉ sapi hlamamaku, ucanika kani’i uka’acua varatʉna. tamuucu takuliacʉ tikiku, mungahlangahla mitilihli mukua matatʉkʉtʉka sasaruanana. malimuamuarʉaku maliʉsʉpʉ vulaihli, kumakitacuaku hlamamakuna.

當一個輪迴畫上句號時，我誕生了。我是一片嫩葉，跟夥伴一樣，清晨接受著露珠的洗禮。我有了自己的思想，開始對世界感到厭煩，抱怨一成不變的生活。我成天躲在陰霾下，與外界隔離，我慢慢變得枯黃，最終，我「解脫」了，落在冰冷的土地上。

這是我想要的嗎？我後悔了，我看到我的父母，我發現父母不知何時雙鬢已經斑白，我傷心地用手去觸摸父母，此時風已消逝，我又一次飄到了冰冷的土地上。我輕輕地閉上眼睛，我看到了我的父母。