朗聲四起
ahluamiana mairahlu uamia acacacihli cucu’u, hliumiana maarua takuamacua asasangara, maaru mʉmʉaku takuamacua ualʉlʉa. hlitakungahla siasasangara ihlaisa sipasamangana, hliurungahla mʉlʉlʉlʉ ihlaisa pakipuhlu siatatara.
mʉlʉvʉ ihlata aariaari arataisa, aralangʉlangʉlangʉ. uamia sala’a ahliacuvungana aralangʉlangʉ, hliarukararamangʉ ka tʉmʉ. ucanika pautuamacuaku, uka’a kupatapuahla caalʉ, uka’a kuualava sala’a.
marakaka marapihli varu’u siangusipa, matakalala marapihli siahluamia, siarataisana sitakualangʉlangʉ, mavacangʉa hliahlumiaku, ucaniika apasapa kuavacangʉ, mucua mavacangʉisa ia mʉcʉkʉhlʉaku mahlukua kani’i sasaruana, kuavacangʉ ka uka’a macuisa tukucuku.
kiariari hlitarutʉahlʉaku cacihli masalangʉsangʉ mamaini ahlaina, marapihli akuisana pakipuhlu siacalaiku mʉmʉa, ucaniika kutalakakukua ihlaku, pasamia kana’a tamuucu takulaicʉ tikiku. marua cucu’u kihlahlamu ihlaku “ maci kuariatara’ʉhla tʉkʉ, kucikia pakarangatʉ, aunana ia maiiakaka takacicihli. ” kani’i marakakacuaku. pausu’ulu takacicihli uka’a sitahlamiamia uvura pasamia, marua cucu’u amihla “umahlikua kani’ina marahlicalivau mi’arahlasʉ takuliacʉ tʉkʉ, rianʉ ma siangusipau.”
kukia atʉhlʉngʉ kariisa cucu’u usumanʉ, ausi hliahlikuaisa ihlau ahla hlialivalʉaisa ihlau, cucu’u ia pisipatuhluhlakia, umahlikua takacicihli mii, maci aunani ia tuahlʉ pihlipalava, tuahlʉaku maritara’ʉhla, cucumacuisa macahlia ihlauna, kupautuamacu ihlau.
ucani siangusipa cucu’una pi sitakuaili macarʉmʉ, ausi macarʉmʉ sipatakalala, macarʉmʉ siarataisana, kani’i macarʉmʉ ma siangusipana, marasihlangʉ siangusipa cucu’u. maci cucuari tuahlʉaku pakituru hlicaliva, ihlaisa siaraacarʉmʉ siuruatukucuna.
成長是每個人必須經歷的過程，過程有成功的快樂，也有失敗的淚水。每一次的歡樂，是正能量、每一次的淚水，是悲傷的宣洩。隨著成長，也越來越艱難，但是我堅信，沒有翻不過的山，沒有走不完的路。有人說：「痛苦、傷心，都是你生命的養分」。我知道這些痛苦，會成為生命中的一部分，改變給予我們的不僅是成長，有歡笑也有淚水，生命才有豐富多彩。
人的一生是痛的循環，破繭的痛，成長的痛，成長就像是蛻皮，成為人生活中的光亮。