朗聲四起

marumukuaku ahlavʉngʉlaia, arumuka ahlavʉngʉlaia tuahlʉ uvura ihlahlamu masunguli. tavahlihla ahlavʉngʉlaiana, aucaucani tavahlihla tamuucu mavacangʉ, matavutavulaʉ pahluisa parahlavaʉ ihlaku, paricani tavahlihla miasihlipi vikiku, musurarauvu ausi tapu’ai. pasamia kani’i, maku tatavahlihla pasaʉlʉsʉ ahlu’u hla tapu’ai tapiaili tapiaili.

marumukuaku ahlamacicia, marumuku ahlamacicia ’acangʉrahlʉ, ’acangʉrahlʉ ahlamacicia ausi vulaihli mamaini. akuku mainimana, maru ina’a apariva, iapa’acangʉrahlʉ tarʉtatʉatʉkʉhlʉ sapi, kihlamuhlamu a ina’ana kisuahlahlama ’acangʉrahlʉ, maru a sipuamiaku ’acangʉrahlʉna, ausi pausasasaliri. hlipacaucauaku takacicihli maku langica miapipihlihli, tapilalʉvʉ ’acangʉrahlʉ tapi’ara’arau, ulavaisa maruaku masungulina matuusuru.

marumukuaku ahlakahlamara, marumuku ahlakahlamara siriaʉvʉcʉngʉ. mahlukua hlipatuaiailia maru a pahlu pusiamʉ mulava ngunguruku, kumita hlimipupururuku pusiamʉ, aucaucauni palungana mahlahlisarʉ hlimilili. kumita rahlʉnga cucutakuaumumana, paraatʉhlʉngʉ ihlaku ucani kari, “ maru mahlipapu taku’i’iiarʉ, mutusua sasaruana rahlʉnga…”

marumukuaku ahla’amisana, marumuku ahla’amisana mapuhli uruhla. aucaucani uruhla muucapi, kutacacurunaʉ masarʉmʉ.

marumukuakumana tʉnʉmʉ, kumita hlingua’ʉ, tʉkʉ tamuucu kupisiasiakʉ kuiatatarʉ,  marumakuaku hlingua’ʉ tʉnʉmʉ.

mataingalʉaku marumuku masunguli siacalaina, marumukuaku ruvaruvaruvana kiʉlʉsʉ ina’a arupakakari, tuahlʉamu murina arukavavacangʉ siacalai. ta’iaraisaka tainana matumuhlu arumukakuna, kuhlaisai marumukuaku mangusipi kani’i.

我喜歡春天的溫暖、花，我在花叢中和蝴蝶蜜蜂追逐。我喜歡夏天的星星，我幻想著在星空中飛翔，跟著星星到處跑，最後在暖暖的懷抱中睡著。我喜歡秋天的豐收，看著結實纍纍的稻穗，一顆顆黃金飽滿，看到農民樂呵呵收著稻穀。我喜歡冬天潔白的雪。有這麼多的喜歡，所以我喜歡上了生活。