朗聲四起

ona’i aikinai ka’Oponohae, dhona’i taikienai dha’ane ’ali’aamadhalaenga dhona’i dha’ane mani paocongocongolo dhona’i takataka lalake. dhona’i aidhi papicongo todha’ane. odholrokadha ka iki dhona’i kadha’anae. ni’idholroadha matakataka dhona’i ’avai odholrokadha ka ’idha’ane. odhaace o’i a’ivivai ’acakelae.

’ina’i lo paorikinai ’ina’i alrace ’i dha’ane, lo ’ialracedha ’i takataka ’aolai lo ’ialracedha “Lakadhaalaelrao” lo miadha, dhona’i aidhi ’a omalra ’i “Lati’ielrao” mia poalrace. lo matolrodha ’i a’olalai dhona ’akatolro ’aolai “Lapadhomalrao” omia poalrace. odholrokanai ka aparamaramao dhona’i alrace dha’ane. alakai lo ’iasemao poalrace dhona’i dha’ane ocao ’a ka olriho’okamao. lo ma’apicongodha dhona’i alrace dha’ane, olriho’omao lo poalracengadha dhona’i ocao. omii’a ana maesale ’Oponoho kaiconganae.

olo pa’aeladha dhona’i aidhi todha’ane, matapoae colo ta’adha’ane, palriho’o ’i cinekelae ’aelanga papicongo lani iimae mia.

lo toalalakenganai, amopasopalraniname linanai poalrace ’i lalakenai. la ’ina’i apoalracenaine lalakenai linanai alracenai ’aamadhalae. lo dhomanae ’a “amopoamita poalrace ’i ahaneli alraceli” omia. ’ina’i lalakenai ’a amodhoolro malra poalrace ’i valravalrae pa’atakatakanai alraceni. lo poalracenai apa’apicongonai tailai la ka’olo poalrace. takaCelevake ’a ka’olo alrace, Leheai ’a tailai alrace. Tainengerao, Samoatoko la Samoakai ’ina’i katolro alrace ’a ’aamadhalae alrace cekelae.

lo poalracenai apa’apicongonai lo maolrolainai lo maolohongai poalrace. lo pa’alilrolainai poalrace ’a tapi’aaeni ’ialrace maolohongai. ona’i akalroolaini lo kisialalra matapii’aenamaine poalrace totakolra. lo maolohongai mani katapii’aine kisialalra lo pato’omao tapi’aaemaine poalrace totakolra. Dhipolo ’a mataadhi’i alrace. lo paolini mani poamaine maDhipolane mia poalrace.

olo ’acakelaeni ’i tailai valrovalro moani ka’olo ’aolai ’acakelae, ova’ai dhona’i takakocingai ’i ’apavalrolo. lo ikidha ’i molrimolritae, aramohamo, ciare adhi’i, livase, dhona’i ’a ova’ai potairahare. la mani dholro moa ’acakelae dhona ’avai. la mani dholro poa tailai alrace poalrace toalakengadha.

說明家名、人名的命名方式與規範；以及與身分不同者通婚時，如何通過傳統物品取得身分平衡的規範。