朗聲四起

ona’i akaava’idhiname ’Aomo: “ma’adhaili valrionomi ’Oponoho. imia! lo ’aela moa ’i Lakolrocae takataadhia’e, amovaa’inainome dhona’i vekenelre todhao takalrevakae” omiiname. mani ki’ivaha o takaarodhange. “oaingata olopo? lo moata dhona amoka’etemita” mani ia ki’ivaha.

mani ovalrisinginame ’i Ciokoko “moa ’aela ’i Bangsoaka” miiname. mani pii’anga ki’ivaha. “alo moata dhoona’i, alo ovelreni, madhao acilai, amodhako’isimite olodho” mani ia ki’ivaha takaarodhange. la ona’i alriho’ongadha aka’etengadha takaarodhange, mani pato’iname ’i atalialai lraodho “pikoanomi, aikanomi ka amo’aaela?” mani iiname. mani ’inikakamamainga o’i atalialai ’Oponoho, “ia’e, amo’aelanai” mia. mani ’aelanai moa ’ina’i tavale’eve’e.

’ina’i taoaenai ’ina tavale’eve’e vekenelre ’i Toladhekae. la tave’eve’eve’ae ’ina’i omiine la ’atoloronai poalrace tavale’eve’e mia. olriho’okanai ’ina’i alraceni ’ina’i holrolo. ina’i dhakerale alraceni ka olriho’okanai. mani poanai to’onai poalrace. ona’i aikinai ’Oponoho madhainame lehe’e. la ’ina’i taoaenai ’ina’i tavale’eve’e, okaodhiname  lehe’e, alakai okaodhiname vekenelre taoa morelehe’e. ’inilipi’anganai pelenge, moanganai tasokosokovae pelenge. kasani lo kalavecengae lo kalapaeceecae lo kalatacovongae, amoanai morelehe’e iki tasokosokovae pelenge.

ona’i arongonai moa ’ina tavale’eve’e omoanai lronge’e ’ina topatilai. pi’amadhalaenanai poa lredheke mairange la ’i vecenge. mani sivate ’ina valrio tapikinanai todha’ane. mani to’arakinai kaolo korokoro toaeaea dha’ane. pa’ehemaenai toramoro.

okaodho ka apoi. to’arakinai ’iingi, madhalremedheme. olo ’olrovo’onai to’arakinai ’iingi mato’ii’iingi. ’ina’i menenga mani poanginame apoi, mani kataadhi’inga, lidha’a valrevalre’ae, lidha’anga dha’anenai. ona’i arongonganai moa ’ina tavale’eve’e, masi’inanai ocao. mani poiname apa’avi dha’ane. la ’ina menenga mani toalalakenga maesale ta’acakelae. mani kasi’iname taikie todha’ane. mani ’atoloronai moanga Tapangodhalae ikinga todha’ane. ’ina’i alraceni ana Tapangodhalae tavale’eve’e maesale. mani poanai lredheke pakisa tokalrovolraenai lredheke pangodhale. dhona’i aoanganai ocao ona ’ini’oalralra, mani poalrace Tapangodhalae mia. mani ’atoloronganai madho’a valrio.

說明萬山從日治到國民政府初期經歷的遷村過程，最後遷至新萬山後，族人如何取得家屋、土地以及信仰變化變的過程及原因。