朗聲四起

singsi ka ’apbaka “kasilivane mitiya ka kacaysyane. tyadike’ee kita nyane sawkoa! sana’asilivi ka maesale ’ikay ko toloanini. ’iyakay ko toloanidra na thiyathiyo, toloanidra na koli’i, ’iyakay ko toloanidra na palealeabe, kasilivane ka dike’eanita ka ta’acoavane. myana: silivini na talyalalay ka amanimaninga na ka wadoo sisilivi na kasilivani.”

ana kasilivane no ’ikayni tacekecekelanita ka kacaysyane ka sawkoa ’aigo’ane dike’eane ka memane, ’odanga na swadrekay si taliyaodrane ka makocingay sawkoa, ana kasilivane ka madrao ko syakaimade paytha na ma’akakwanga, ana memane silivi taladrai ce’ee gamoco ka syaakaynga kimade na silivi di’ici, lasodoo maepenge ’amameane makocingay.

kasilivane ka makocingay namya ka thakongadavane, ikamanimani ’amameane pakiyamaw na ta’acoavane na dike’eanini taka’aganini, makocingay ka zaysange, no mobaba’animade, idoo kimade pakadroa makocingay ka sapabaolo, myana moimoikane, moitolotho, gamogamo, amanimaninga na talyalay ka wadoo simameane, layana pa’apothingalane na ta’acoavanidra dike’eanini.

ko cengecengelita ’atalese ka ’iyakay na ce’ee, kedrekedre, sananapi, bakekeai, kyasa’apaanga zidai bwaithinga na taiyane, mo’i’ithinga igilane, nakaynga na silivi ka mayagi’inga, ko paithaini ko booane, doonga paiytha na saka’ieleleane na memane, sikaynga na maagi’i na memane kasilivane ka makocingay ka memane sapalanganimade ka syapabaolo kimade makasi ti’icanenga nakaynga ko tyakikadringay pabaithinga na ba’owane na silivi lakasalenga namiya’ ikay na silivi iiya ko booane sakakocingaini makasi idoo kiname ’oipi.