朗聲四起

ianan naak a mathuaw mangqtuqtu a lalawa latata. itia naak a tantuqash a binanau'az a minlhafut latata, mashtantuqash thithu ya mat iakin rima wa qamishan. mathuaw lhungqizi thithu iakin, numa mathuaw mani mushnaw iaku thithu, mathuaw mapakadaidaz iamin! insai laturu tinakawash maqa panshizan thithu mimbabuqbuq mushiza iamin naak a tantuqash binanau’az a minlhafut!

mangqtu iaku tu min’ananak, naak a ama ina maqa amututusi buhat mubuhat numa uka shawashawan lhungqizi iakin, numawan naak a tantuqash a binanau’az a minlhafut alhungqiziqizi iakin, thithu fuilh iakin apinatash a patashan numa kmathu iakin mutusi lhupilhupishan a taun malhupish, az’az sa naak a tanatuqash binanau’az mindahip lhungqizi iakin thithu, naak a tantuqash miazai sa naak a ina tu isisua.

ya shaunamara’iniza, mamzai iamin iananiza sa ananak a taun, maqa thithu mu’ayuzi, mu’ayuzi iaku mani, sharaqian inintusi naak a binanau’az a minlhafut mu’ayuzi mathuaw ihazish a pruq, kanuniza miaqay iamin mususuun ya mutaun, numa miarain palhintaz ita mutusi kilhnaqaualh, numa miaqay iamin palhinuna sa ling-waa ya mindaaq ya malhalhinuna, numawan mathuaw iamin ya minra’iniza miaqawan mapakadaidaz.

naak a tantuqash binanau’az a minlhafut isa mashpatiziza wa qamishan, maqa antu maqitan thithu sa buut, mutusi mriqariqaz shiz a taun kmilhim miakuza sa buut, shinshii mzai mathuaw thithu panshizan, isisua mathuaw kasalpu iakin, munsai latataiza wa kawash mathuaw a lhungqizi, mimbabuqbuquan mushiza iamin thithu! maqa panshizan thithu mashiqarman mashipuqu, minpanu iaku thithu s izai a shiz, numa muqayza shduu iaku lhungqizi thithu, miazai sa kahiwan tu langqisusayuan naak a tantuqash lhungqiziqizi thithu iakin dai! sharaqian ukaiza thuini thithu, kanuniza iananuan puilin thithu manasha wa pinashtiruq numa ianan sa kininaian thithu a laqup, numa sa thithu puilin numanuma wa aniamin. mangqtu iaku naak a tantuqash a binanau’az mathuaw miku tumaza sa mashtatun a quyash, numa ya amashtatuniza, mangqtu iaku naak a tantuqash amushuqish mutauniza, izai a kalawan az’az sa iamin mangqtuqtu thithu a numanuma. 

一個懷念的故事。我有個很疼愛我的姊姊，從小父母親因為忙於工作，都是姊姊在照顧、陪伴我。直到長大後，姊姊嫁到很遠的地方，我們還是會經常回娘家、一起出去遊玩、常常打電話聯繫，感情還是跟小時候一樣好。

姊姊因為生病離開我們，家裡依然保存著姊姊留下來的照片及她用過的物品和住過的房間，這些是我們對姊姊懷念的痕跡，記得姊姊最喜歡聽舂杵音的聲音，每當舂杵音時，我都會感覺姊姊回來到我們的身邊，回來聽她最喜歡的杵音。