朗聲四起

isa Baraubaw ianan latata wa kataunan, zain mani sa “Ita Thau”, Thau a lalawa zain “iamin sa thau” dai, numa izai sa Thau miasuun ininthawan a kataunan, tu kahiwan ianan sa suma wa Thau fariwin inangqtu a aniamin masa fariwin sa Thau maqitan a kakaanin, maqa thuini makitnasha sa kilhnaqualh a thau munai Ita Thau, numa isa saran fariwin numanuma wa aniamin a thau makitnasha mani, numawan minthuiniza inai zain sa “Ita Thau sasaz a saran”.

inai shduu kaanin sa maqitan Thau a kakaanin, miazai sa pasain izai kamar kinalawa wa qmu numa pasain izai kamar minqilha numa pasain sa qris kinal’in sa wazish a bunlhaz… numanuma sa Thau maqitan a kakaanin, numa inai ianan mani fariwin pasain sa Thau pishfazaq maqitan lalawa wa rumfaz “shmadia” kinalawa numanuma wa inangqtu a aniamin.

ya shaunanaiza Baraubaw, shduu punbarimbin numa shduu mani milhungqu sa ruza, ya amunai Ita Thau a kataunan, isa Zintun ianan lashpaat a mara’in a shamamazaan, ianan Mathumathumay a shamamazaan numa Ma’awaq a shamamazaan numa Ita Thau a shamamazaan numa Hian-kung-sii a shamamazaan, az’az shduu milhungqu sa ruza mutantu Ita Thau a kataunan, numa shduu mani mriqariqaz izai wazaqan a shirshir lamaqitan a shawawa’an ya milhungqu sa ruza!

Ita Thau a kataunan ianan latata qmaqutilh lhkaribush a qnuan a farifariwan a taun, izai sa mashtay a Thau kinalawaiza, inai shduu minriqaz sa Thau a mashbabiar numa minparaw, shduu mani ifazan sa Thau a hulus ya pashtiruq, shaunanaiza wa kilhnaqualh a thau mafazaq initusi Baraubaw a Thau tu kahiwan a kazakazash. izai a pruq ianan puilin manasha sa Thau tu kahiwan a kazakazash.

itia makitnasha sa thau miku munai Ita Thau thuini, numa inai mani makitnasha sa bzu, ya mutantu s izai a kilhnaqualh a thau, mangqtu iamin thaithuy shduu madanul s izai a pruq, numa mathuaw apakadaidaz izai maqitan a pruq.

伊達邵部落是邵族人聚居的地方，「伊達邵」在邵語為「我們是人」。早期族人販售紀念品與美食，隨觀光發展，逐漸形成熱鬧的「伊達邵老街」。這裡可以品嚐到特色美食，街上也有販售以貓頭鷹為主題的紀念品。

前往伊達邵可開車或搭船，日月潭有四大碼頭，朝霧、水社伊達邵、玄光寺碼頭皆可抵達及欣賞湖邊的景色。這裡可以看到邵族杵音表演及穿傳統服飾拍照，也能讓遊客認識在地文化。越來越多人來到這裡，希望大家能一起珍惜這片土地！