朗聲四起

Awaay ku makaditekay hacuwa kadadahal nina kakarayan. Anu cahedalan salangdaw saan awaay ku benis. Adihay ku cengel nu calamay, ira ku buhecalay, lahengangay, atipulingay, muhetingay, matiya u badahung nu luma’ kira kutem, paading i tamiyan tu cidal, sakacaay ka inging nu cidal. U bulad hantu adihay tu matiya u mamulmulay, masalitaulay, pasakudulay ku likaku, pasalanu’ay ku likaku, ruma satu mapaading caay kamelaw nu mita, u ruma satangelal saan ku bulad, rumasatu maulem, awaay ku satuku nu bulad a patanengal tina seraan. U bu’is nu kakarayan sa melimelic saan, awaay ku makaasipay nu mita tu bu’is. Patanengal i kakarayan, anu sadak sa ku cidal, awaawaay tu a mamelaw kira bu’is.

U bu’is caay kahaen u alipawnay sacudacuday, sabahebaher saan, nika aluman ku biyabiyawan nu heni, i tila mamelaw ku sitanenga:lay sicaayay katanengal a milawan. Si sasamapaneng sananay a likat nika caay tu kapaneng. Herek sa nama ‘urad caay kanca kasadak kira Talakal ni Adek. Adihay ku cengel nira, matiya u lahengangay, atipulingay, langdaway, salika’uw saan, matiya u sakatayra i kakarayan a kayakay. A mapaca’it i kakarayan. Sulinay suwalsa ku bayi, naira ku mahaenay a kungku, ira kiya mabanaay a miadup, ci Butul han ku ngangan, mabana’ a miadup caay kanca pabatis tu niadupan, caay katarahad sisa aluman ku kabana’an atu cabay, tiya cacay a remiad caay kakapah ku kakarayan, sadak sa tusa ku cidal, caay tu pakahemhem ku hekalay a ma’uripay nu tamedaw, malawla tu ni baedet, milimk tu amin ku tamedaw i sa’usa’uwacan, a mikisasaepi’ cima hakiya ku makubilu’ay tina tusa nu cidal.

Tangasa satu i panan nu tumuk a mangalay tu nabana’an tu Tumuk, a palita a maanan kinaremiad. Sulinay paca’ub satu cira cima ku mabana’ay nu mita a mipana’satu . ka’akuway satu ci Butul a paayaw tu caayay pakatungtung tina remiadan. Sulinay malingatu tu a malingad a tayra i tungeruh nu lutuk a mipana’ tu cacay a cidalan, hacuwaay hakiya ku naremiremiadan a miditek tu sapana’aw tu cidal. Tiya cacay a remiad tu dabak, tatatahekal i narakatan nira cacay tu ku cidal. U lemed nu tamedaw araw mateker ni Butul kira cacay a cidal a masumad ku remiad, tunamahaen salipahak satu ku ma’uripay a masadak a malingatu tu amin a tahekal namakakilakilangan atu sa’usa’uwacanay. A misakilemal a misuayaw i sasa nu kakarayan a ma’urip.

描述天空的神秘與美麗，包括天的無邊、變化多端的雲、月亮的不同形狀與明暗，以及閃爍的星星和雨後出現的彩虹。接著講述一則長者傳說：獵人Butul樂於分享，深受上天眷顧。當天上出現兩個太陽、世界難以生存時，Butul為了解決災難，獨自前往山頂尋找方法。經歷多年努力，最終帶領人們走出困境，在天空下快樂生活。整篇文章融合自然觀察與傳說故事，展現對自然的敬畏與人與天地和諧共存的理想。