Tu lingatu a micudad i cacudadan, tada tarakaw ci Bahi aci Hana sisa matatepar ku heni a maru’, Kalamkam malakapahay a malacabay ku heni, terepsa ci Bahi mabana’ ci Hanaan a misanga tu maamaan, ci Hana hatu i, masababainay ku wayway, mihakulung ci Bahian a tahekal a mihulul, saremiremad saan a mihakulung. Tuya cacay a remiad hakulungen ni Hana ci Bahi a taheka a mihulul, a mana’un a taluma’, maanen naca a misakalabi cira, a mana’un ku wina a taluma’ sisa makalah a taluma’. Nika caay hen kangalay a taluma’ kaku ira! Mahaen ku nipi’uter ni Hana i ci Bahian, anu mahaen katayni i luma’ nu niyam a mihulul satu. Caay pakadungdung tu nikaletu ni Hana hayi satu. simsim sa ci Bahi mimaan pihaceng a mana’un tu a manaay a taluma’ hakiya satu.
Tangasa satu i panan nu luma’ na Bahi, mapacekuk ci Hana, mapacekuk a makamelaw tira mabuhabuhangay a luma’, awawaay ku maamaan naca i nipateli nu luma’, tayra satu ci Bahi i aniba a misawsaw tu belac a misakalabi, miciyan tu dating, maekek ci Hana a makamelaw suwal satu: waw! Mabana’ kisu, kahemekan, a maanenaca saw! U demak nu maku kini sisa kalamkamsa a midemak. U mawmahay ku matu’asay nu maku, caay ka hacuwa ku pida, yu ruma taheceremsa a mawmah, akutu ku pataduay i tu henian a miherek tu demak nu luma’, hacuwa ku nika’utang a taluma’ tu kalabian, taluma’aca a malabi, makumud amin ku lalabu nu luma’ a mimelaw tu tilibi, makakungku, masasuwal. Tengil sa ci Hana manglay a malalaluma’an a malecapu a ma’urip. Tu namahaen hina tayratu ci Bahi i luma’ na Hana a mihulul sipicakay nu wina ni hana tu sasalamaan, caay pakasimsim ci Bahi tadabangcal ku luma’ na Hana, dadahal, sipapatelian tu cudad, sasalamaan, tadabangcal tu. Hacuwa hakiya ku ngalay nira balucu’ ni Bahi, a mahaen ku lalabu nu luma’. Waw! Bangcal ku luma’ nu misu, mamaan naca u ‘urip nu misu ku ka’ulahan nu maku, saremiad saan a mahekulul atu lalabu nu luma’ a ma’urip, caay ka haen aku, sacacay saan awaay ku pacabayay. Adihay ku demak nu wina saremiad saan i hekal, mabuti’tu kaku itiya a taluma’, caacaay pacabay i takuwan a mimaamaan, u bayi tu ku pacabayay, sisa caay kangalay kaku a taluma’, sisa mahaen a misalama tu sasalamaan, sipicakay nu wina tu cudad, maaini tu a mimelaw tu maamaan a cudadan.
