朗聲四起

Alang dSediq cbiyaw, pusu qpahun dsnaw ka waya tmcamac, ou bay kluwan ka waya ddaun dha musa tmcamac lmiqu. Niqan kingal waya ka sbeyhing dha bay qmita mi ini dha bay srhuqi, niqan kingal tmngaw diyax ciida, brah musa tmcamac ka mptcamac, mtutuy mi mtahu puniq ka dhiya han, paru ka tnhuwan dha puniq daw, kiya madas tahuc puniq, musa qmita snkyaan dsisil mi mbahang nyusan dsisil elu ssaan dha lmiqu, nasi skaya ssiyaw dha mi mqaras muyas ssiyaw dha ka dsisil, mkla sa nii pkla mtduwa musa tmcamac mi musa mblayaq bay ddaun dha musa tmcamac ka dhiya, nasi mtuq brah dha skaya mi mruba hngak uyas dha ka dsisil, mkla sa nii pkla ini tduwa musa tmcamac, nasi musa daw niqan naqah ddaun dha smtrung ka dhiya. Pusu ptwaya mi pnskraya dsisil nii ka Utux Tmninun, kndadax kingal kari pnngalan rdrudan Sediq cbiyaw, kika dalang sediqun cbiyaw balay sa, alaw ini sbeyhing qmita wwaya Utux Tmninun, kiya wada ppangal tunux ka kndusan dha, ini bay psblayaq mi pwwalu ka pnluban dha, so nii wada sqnaqih kuxul Utux Tmninun mi ini na plwani ka dhiya, spuda na spi splawa na mi ptraun na lnglungan ka tru qqbhni, kika dtiyayung, dpcipin mi dsisil musa pssuung hmaqur bbtunux, ima ka wada mangal pnspngan dha nhdaan balay, kiya ngalan na ptwaya snkulan musa knama pkla kari sediqun, spuda dha qmita snkyaan dha mi mbahang mnuyas dha ka dSediq, miya pkla ya kkudus, hhuqil, rruba mi ssblayaq ka mmiyah enca. Babaw na miyah ku smnru ndaan dha pssuung ciida.

Dtiyaqung, scuqi bay mquwaq mi ini pskingal ka lnglungan dha, kiya ini dha hari kbiyaxi kmudaw ka btasil, wada kmdudul msridil lmlu dnuuy dha, srhuqan dha psdhriq mipix nanaq qaqay dha, maku balay msdaring lmingis mi mppika wada skaya ka dhiya. Dpcipin, tnrmalan dha kmudaw knama ka dha ttipiq bbtasil han, ini dha smai daw kiya kmmalix ka lnglungan dha, alaw miicu pksaang mi pcahu Utux Tmninun ka dhiay, kiya wada mwaaw tipiq bay btasil, kdaun dha mi hqulun dha Btuwan hiya, babaw na wada ssbotaw mqaras mi ppskuraw mqaras muyas ka dhiya, kiya wada asi rcuhi mbanah quwaq Utux Tmninun ka dhiya. Dsisil, daan dha knama lmawa kana ka lutuc ddadal dha, bliqan dha balay muru ka kari Utux Tmninun, asi pskingal lnglungan mi mblayaq bay pprrngaw, ana nanaq ttipiq ka hnyuwan dha, wada dha qrngun kmudaw mi hmaqur Btuwan hiya ka dha prparu btasil, kiya mi mhnang yayung hiya kana ka uuyas qnaras dha, kiya wada pyaun snkulan pkla kari Utux Tmninun ka dhiya.

 

鳥占是獵人出獵前最重要且不可或缺的儀式，關乎打獵的安危。獵人會以繡眼畫眉的聲音、飛行方向，判斷吉凶。這源自神話傳說，當時烏鴉、紅嘴黑鵯、繡眼畫眉舉行搬石頭比賽。

繡眼畫眉，因召喚所有的族類，遵行神靈的啟示、共商對策，牠們體型雖然最小，但透過合作，成功搬動兩塊大石頭，獲得神靈賞賜靈鳥的美名。人將牠們視為編織神靈的使者，敬畏並遵從各種預兆。