朗聲四起

sa’sa’ih noka SaSinSinrahoe’ hayza’ ni nonak ka kaspengan.

noka SaySiyat ray sa’sa’ih tinal’oemaeh ma’ hayza’ nonak ka kaspengan kapatawawen. haysani ’ima haysiya ka kaspengan noka SaySiyat, hayza’ koSa’en ’omowaz ka ba:i’, ray ’ima ’aehae’ ilaS matawaw ka hini, kamamatawaw ka baba:i’ Sinrahoe’. ray ’ima roSa’ ilaS ray kilapa: hayza’ noka tatawazay koSa’en ka tinato’ nasiya ka kaspengan. o noka hayawan ila ka kaspengan ma’ ray ’ima roSa’ ’ilaS matawaw ka hini koSa’en baki’ Soro:. ray ’ima to:o’ ’ilaS ’isa:a’ noka Sa:wan kak’a’owazan ila. ’omowaz ka kawaS hayza’ koSa’en pa’oral o pa’aezaw. kakhayza’an hayza’ koSa’en pongiyo’ ray bala’ komoSa’ ’emlet ka ’ima ’aewhay ba:i’. haysani ’oka’ ila ’inakhinian kaspengan. ’a’owaz, sa’sa’ih ka tina’oemaeh kakawaS, ’aehae’ tinal’oemaeh ’ima sobae:oeh ’isa: to:o’ hahila:, ’aehae’ tinal’omaeh ’ima ’ol’olae’an ’aehae’ nanaw hahila:. So: lomohaeper ka tinal’oemaeh ’am paSta’ay ’isa:a’ ’ima ’ol’olae’an. ray ’ima to:o’ ’ilaS kapatawawen hayza’ nahaen ka pit’aza’, haysani baba:i’, titiyon, Sayna’ase: o karkarang Sopat ka Sinraehoe’ haysiya wawa:ih matawaw ka hini pit’aza’. ray ’ima Sopat ’ilaS ’isa:a’ paSo:Sinrahoe’ nonak paSbaki’, monhael nahaen kapaSbaki’an ray ’ima lamgpeazo’aehae’ ’ilaS, ’isa:a’ ’aehae’ tinal’oemaeh monpoSal paSbaki’. ’aehae’ nahaen kinra:aman noka saboeh, ray ’ima langpez ’ilaS koSa’en paSta’ay. raSa’ tinal’oemaeh monhael paSta’ay, langpez ’ilaS ’isa:a’ Somaton, titiyon kamamalahaeng ka hini paSta’ay.

hani saboeh pinayaka:i’ ka kaspengan noka SaySiyat, ’aring kakhayza’an a tomal ’ima rengreng ila. kano’ Sinraehoe’ nom matawaw ka kano’ ma’ noka tatini’ pinaSowatoroe’ ila nanaw, tabin ’isahini ’okay boloe’. So: potngor ila ka hahila: kano’ kapatawawen? kano’ Sinraehoe’ nom matawaw? ma’ matawaw ila, sa’sa’ih ka tinal’oemaeh ’okay ngowip. ’ana ’inowan ma’ kataSilotoron noka minahael, tabin ’inowan ’am haysiya, ’amkay boloe’ ka hini saboeh noka tatini’ Sinbil ka kaspengan noka SaySiyat.

每族都有歲時祭儀。賽夏族的儀式，有風姓負責祭祀鎮風祭、五峰趙姓負責祭祀獵首祭、夏姓負責祭祀神龍祭、祈天祭包含祈雨、祈晴以及已經消失的驅疫祭等。祈天祭每年舉行，一年大祭一年小祭，當年遇到巴斯達隘則為小祭，祈天祭歷來由潘姓家族主祭。還有播種祭，由風姓、朱姓、芎姓以及解姓輪流負責主祭。祖靈祭一年兩次，一次春耕，一次秋收。眾所皆知的巴斯達隘每兩年舉行一次，由朱姓家族主祭。歲時祭儀是歷年傳統，流傳至今。