SaySiyat mae’iyaeh ’aring kas’oehaez mabasez hayza’ ila noka SaySiyat ka raro:o’, ma’ hayza’ ’in noka SaySiyat a nonak ka karo:o’an. korkoring So: kas’oehaez ila, noka tatini’ ma’ Siro:o’ ila. So: kamamanra:an minatini’ ’isa:a’ Siro:o’ ka ’in baki’ a ka raro:o’, So: minkoringan ’isa:a’ Siro:o’ ka ’in koko’ a ka raro:o’.

korkoring ba:ba:aw kas’oehaez So: ’aehae’ ilaS Sahpi:ih ila ’ima rowaSek, ’isa:a’ maraS ila ray lolongan. So: komoSa’ hini ’aehae’ ’ilaS hayza’ bazae’ ka ’ima ’aewhay ’isa:a’ ’aewhay pas’el ka korkoring, ma’ pakSahpi:ihin ka hini ’ilaS, So: ’ina komonhowih ila ka ’ilaS, ’araSen ila ray lolongan. kakhayza’an sa’iwaz hayza’ maraS ray lolongan, rima’ ray kama ’okay ka’sih ka ralom, haysani mari’ ray ’inaro: ila ka ralom.

’am romo:o’ ma’ minSa’la’ tal’awan ka kati’azem. hini kati’azem ka hinbetel SikoSa’ kamaromae’ael ray ra:i’. noka tatini’ komoSa’ hini kati’azem wa’isan romae’ael, ’osa:en ray ’ima minis’oeh sowiti’ ka ra:i’ ma’ sem’el ila. korkoring ma’ ’am nak kati’azem hingha’ ’am kayzaeh ka sin’el. So: ’am pas’el ka korkoring , kamapas’el ’isa:a’ minSa’la’ homo’mol ka ralom ray ngabas, mari’ ’aehae’ ka biyae’ noka kati’azem, Siparingo’ ray ngabas ka hino’mol ralom, ’isa:a’ Siparpe: kan korkoring ray rae’iS, mari’ ’aehae’ naehan ka kati’azem biyae’ parpe:en ray ’asap kabih, mari’ ’aehae’ biyae’ parpe:en naehan ray kakabihkabih ’asap o ray ngo:o’ ’oyaeh. saboeh Sopat biyae’ noka kati’azem Siparpe: ray kinmae’iyaehan. bi:il ila ’isa:a’ monto:ol somisil o ’omoe’oe: Sa’ “se’el! se’el !se’el!”. So: Siro:o’ hi ’itih ma’ Si’oe’oe: Sa’ “’itih se’el !”, nakhini ’isa:a’ sizaeh ila romo:o’.

’isa:a’ noka SaySiyat ’am romo:o’ hayza’ piza’ kakSekla’an ka hoehoero:en mita’, ’ana ’aehae’ ’okay panhae:ae’i. koSa’en komi:im ’ima kayzaeh ka hahila:, o ’ana ’inowan ’okay ka’sih ralom, ’aehae’ naehan koSa’en ka kamaromae’ael ray ra:i’ ka kati’azem, hini koSa’en nom pas’el. hini noka tatini’ Sinbil no SaySiyat ka kaspengan nom romo:o’, koSa’en paSanti’azem.

賽夏族有自己取名字的方式。小孩出生之後，家中長輩就會給新生兒取名字。若是男孩就取爺爺的名字，若是女孩就取奶奶的名字。

新生兒大約在滿月之後為其命名，若當月在部落裡或親戚之中有不幸之事則在下一個月初取名字。傳統的說法是maraS ray lolongan，意思是帶到溪邊去，以前真的帶到不會乾凅的水源為新生兒命名。現在因應現代化常以家中水龍頭出來的水就可以了。 

賽夏族命名的儀式有幾點是不可缺的要素，如天胡荽、水源、命名者。這就是賽夏族先人流傳至今的傳統－命名儀式。