朗聲四起
Pisakaro’an a lisin, o no Payrang a likakawa^ koni, caay ko no Yin-cu-min-cu a lisin, awaay i serangawan no mita ko matiniay a demak. Onini a lisin no Payrang i, mikiningay to demak i kafodifodan no ’orip naira, saka caay ka sawad naira a mirayray i ’orip naira, saka tangasa^ anini^ a makining maharateng no kalotamdaw konini a demak. Halokita o Pangcah a mikotod to mahaenay a lisin no Payrang i pisakaro’an.
Toya romi’ad, 8 folad 15 romi’ad no maomahay, toya dadaya^ malikat ko folad, salipahak sa ko tamdamdaw a malayna^ malakapotay a masa’opo^ i potal no loma’ a mi’id’id to maamaan a malokakaenen. Nikaorira, mafokil kita maan saanay konini a lisin?
Ano sahecien no mita a miharateng i, pasifana’ay titaanan “karikec ko ’orip” saanay a paini konini a lisin i titaanan. So’elinay o nika rikec i ’orip no mita i, tada o kakalimelaan. Tinako sa:
I cecay a paro^ no loma’ ano papinapina^ ko malikakaay ano marikec caira i masatamdaw ko cecay a laloma’an; ano paytemetemek saan ko malikakaay i cecay a paro^ no loma’ i, o mamalasawad ko rayray no to’as, ato mapakangodo^ ko malinaay, mamalikaf no finawlan ko matiraay a parod.
Itini i picodadan i, o kakalimela:an to ko nika “rikec” hananay, tinako sa, ano malalifet a mimali^ ko kasacefacefang no mitiliday, ano caay ka lacecay ko faloco’ a marikec i, caay ko mamalowid ko sasi’ayawen a milifet a mimali^. Ano sapilowidaw a milifet a mimali^ i, deng o nika lacecay ko faloco’ a marikec ta malowid ko sasi’ayawen a milifet.
O malikakaay i cecay a paro^ no loma’, ano eca^ mitiliday i picodadan a sito^, o nika rikec naira i tadakakahemekan no mita. Mangalef kono niyaro’ a nika rikec! Marikecay a niyaro’ ano o maan to ko demak i, mafana’ a masasidama^ masasipa’ayaw, samatiya saan o cecayay ko loma’. O mahaenay a niyaro’ i, o ka’inalan malipahak ko po:long no finawlan tona marikec ko niyaro’.
我們的文化中沒有中秋節這樣的節慶，如今連我們也參與其中，慶祝中秋節。晚上親朋好友團聚烤肉，這個習俗的精神目的是團結。團結是我們生活要學習的功課。兄弟姐妹如果團結，家庭必和樂融融；兄弟姐妹若各行其是，家庭必會崩解。在學校裡「團結」是非常重要的功課，一個球隊倘若無法同心合一，如何能戰勝對方？
不論家庭或在學校，「團結」都是重要的課題，對於部落更是要事，懂得互相服侍、禮讓，這樣的部落裡生活必定和諧安樂。