朗聲四起

Malifet to no mako ko sowal no ’Amis i siwa polo’ ira ko cecay no mihecaan, tadaminanay ko faloco’ ako to sakalasingsiaw. Itiya to a misa’icel kako a minengneng to tilid no mita, misalicalicay to kako to i ’ayaway a malasingsiay to icowaay ko pikingkiwan pinanaman to hahamalasingsi a kongkoan. Misitapang to kako a mipangangan i Se-Ta ta’angayay a pitilidan, matungatungal to ko fana’ ako i, pangangan to kako a mikihatiya to kinkiw nanam. Tangasa i siwa polo’ ira ko sepat no miheca i, miteka to kako a micumud i kongkoan, kiwkay ato i niyaro’ a pasifana’ to sowal, caciyaw, tilid no ’Amis i wawawawa, salikaka ato finawlan.

Harateng han nako i laloken mikihatiya a minanam to masamaamaanay no kingkiw nanam, mitungal to sakafana’ a pasifana’ to mitiliday; mitungal aca to sakafana’ to kasarayray no sowal saan ko faloco’. No niyahay a likisi ato serangawan, tahakemoden ako a mikingkiw, micekiw ato miwadwad, ta maxera ko no litengan ho a sowal. Pasifana’ aca kako to radiw ato kero, serangawan no niyaro’ ato kadadutudutuc no ’orip; nga’ malecep namira ko no litengan ho a pinangan, awaay to ko malawaay to sakalatamdaw malowawa no ’Amis.

Malalok kako a milicay ato minanam to nga’ayay a pinangan, ya narakatan, na’ikoran a lalan no malitengay. Inanengen aca a palatilid to nalicayan i malitengay a licay, ta ira to ko tanengnengan no wawa ato finawlan, anca o mikingkiway to serangawan a citanengay, haenen ta cowa to ko mamalahedaw ko lekakawa. Maketonay to ko caciyaw, itinien i loma’ a paluwad, malamaan o romaay to a finacadan ko ramod. Mansa micumud to i kongkoan a pasifana’ to wawawawa a minanam to sowal ato tilid, rariden a misano’Amis a caciyaw, halafin to ko pitengil no wawa i malaput to namira ko caciyaw ita, hatiniay ko minanayan no faloco’ ako.

Kinatosa to kako a miseking to sakakaay a lalifeten to sowal, ’araw han caay to pakalifet to sasekingen kako. O kacangoot to no mako to fana’ no liteng, mataneng ho ko nananamen to na’ikoran namira. Nanay ano lalomihecaan, malifet to ako ko sakakaay a lalifeten to sowal a miseking, mahapinang to hakowaay ko fana’ ako to serangawan no ’Amis, ta macakacakat to ko sapakafana’ ako to mitiliday ato minanamay, saka mafana’ to camira a misano’Amis a malalicay, mapalowad to ko caciyaw no liteng, oninian ko tadaminanayan ako a demak.

決定成為族語老師，進入學校從事族語教學，除了深入探討其歷史文化，並於教學中會傳授歌舞及部落文化。我勤向耆老請益，訪談後建檔逐字稿，留下文字史料使部落史資料，避免繼續流失。阿美語式微，若是家庭共同語言，孩子聽慣了便會自然習得，這是我心中的期盼。

願自己能順利通過優級認證，驗證自己對阿美族文化的瞭解深度，提升教學文化內涵，是我最大的祈望。